فرید بھنڈار

ایہہ اَمَل تاساں امرت1 راساں 2 نیں

چڑھ جیٹھ منچ3 تے

ہاڑِیاں 4 نُوں کِھڈواون بسنتی5 کھیال6:

لاؤ کپاہِیں

دان پرِیتی پرِتھمی7 دا

دیو پرِتھمی وِچ کِھنڈا،

تِھیو پُونیاں

ٹوہ بسنتر8 واس9 اساڈی

دِیوے گُھوک10 جگاؤ

گِھن تیل ترُبکا بابے11 کنوں وِچ پاؤ

1- امرت= 1) اَمَر، 2) سدا جِیون دیون والا رس- 2- راس= کرِیڑا، ناٹک، رنگ- 3- منچ= سٹیج -4 - ہاڑی= 1) ساتھی، بیلی، رل کے کم کرنہار، آڑی، 2) ہاڑ وِچ واہی کرنہار- 5- بسنتی= 1) بسنت رُت دے، 2)بسنتی رنگ دے، 3) نابری دے، دھگان ٹَھلن دے، اُتھل دے-  6 -کھیال= ڈرامے- 7- پرِتھمی= دھرتی- 8- بسنتر= اگ- 9- واس= سگندھ- 10- گُھوک= ڈُونگھی نیندرے سُتے-

11- بابا= نانک (دِیوا میرا ایک نام، دُکھ وِچ پایا تیل

اُن چانن اوی سوکھیا چُکا جَم سوں میل)-