جموں ڈِگا اِک
مگرے دُوجا
پہلا آکھے کیہ گناہ اساتھوں ہویا
وِکدے نہیں اسیں وڈیاں دُکاناں چڑھ کے
بُھنجے ڈِگنے آں
دُوجا آہندائے امب ہوندے تاں وِکدے
کول پئی اِک گِٹک سُکی آہندی اے
نیت کرم جے
اگلے جَرم وِچ امب تھی لگنا
کچے تروڑ کے اگلے پَیل تہاڈی پاسن
مَنڈیاں وِچ لواسن بولی
پیٹیاں اندر ٹھوک وگاسن باہرلے مُلکھیں
ایتھے اوتھے ہٹیو ہٹی بُھوا
انّھے کُھوہ کھاتے وِچ ہِندسہ کر کے قلم تہاڈی لاسن
ایہہ گل میکوں جِس امب دی گِٹک دسائی
روندی آہندی ہئی
مِٹی وِچ میکوں نال سما تے جموں کر گِھن