بس ہٹیاں کول رُکی
پہہ پِنڈ دا
اک ٹانگہ
ٹانگے ہوندے نیں جیہو جیہے پنڈ دے
ترے کَھلِیاں نیں
اک چھوہر کول اے خاوند نکی دا
وڈی آہندی اے ''وے چل باہوں پھڑ سو''
نکی آہندی اے بانہہ چُھٹکار کے:
''مر جاواں جے میں جاواں''
لال گوٹے والے کپڑے نیں چُوڑیاں نیں
کُچھڑ کُڑی اے
وڈی نما جیہا مُسکدی اے: ''کُڑی چک وے''
نکی آکھدی اے کُڑی پرانہہ پھیر کے
''بس ہو گئی جیہڑی ہونی سی
چنگا دس چھڈیاس جو ایہہ ہے''
''تینوں روٹیاں دی تھوڑ اے؟ اسیں مر گئے آں؟''
چمکی اے وِچلی
چھوہر آکھدا اے: ''بہو بس ٹردی آ''
''ایہنوں ماپیاں نے دھپہ نہیں سی ماریا
ایہدے نال تے بھرا نہیں اُچا بولدے''
''جیہڑا بولُو ہن ویکھ لؤں نا- جا بی بی دھی''
وڈی مُسکدی اے
چاء پی کے ڈریور آہندائے: ''ہل او سوہنیا''
کلینڈر گنڈھ لئی اے چاء
کڑی چھوہر نوں پھڑا نکی روئی اے:
''ایہہ وی لے جائے
لے جائے ٹومب ٹلا وی''
''لِلّاں تھوڑیاں لئیاں سُو ہُن ویہنے آ نا'' وڈی مسکدی اے
''بی بی بہو وی نہ وچ'' گنڈھ دھر کے کلینڈر بولیائے
''ساری عمر بھاویں میرے کول رہو توں
کھاوے کھیہہ جیہڑی کھاندائے'' آکھے وچلی
''میں نہیں جانا میری اکو ایہو گل جے''
نکی چڑھدی اے آکھ رہی
بس ٹر پئی
اکھاں پونجھیاں
کڑی پھڑ لئی
ٹانگے وچ بہہ گئیاں نیں وڈی وچلی