”اوہ،
لُوہ سٹیا اے1 مُونہہ مینڈا
کڑاہی تینڈی نے“
”لؤ میاں جی،
برفی کھاؤ
برف جمایا مِٹھا مُونہہ وِچ پاؤ“
”برفی ٹھنڈی نہیں ہوندی
ایہہ تے ناں اے اوہدا
اصلوں بھاویں گرم ای ہووے،
مُونہہ ساڑ کے مینڈا
اُتے شاعری دُھوڑنائیں پیا“
”جلیبی گرم دیاں؟
حکیم صاحب آہندے نیں پَھل گرما
گرمی لاہ دیندا اے،
جلیبی ناں وی تپیا ہویا اے
جَل بنی دا“
”مُڑ شاعری (ہسدا اے)
پَھل گرمے دا ناں پہلے سردا ہوندا ہا
وت گرما کر دِتا تینڈے جیہے کِسے سیانے،
تاثیر وی اوہدی بدل گئی ہووے“،
”حال دسو ہُن مُونہہ دا میاں جی“
1- لُوہ سٹیا اے: ساڑ دِتا اے-
”ہُن تے ٹھنڈا اے یار،
واہ، شاعری تینڈے کول دوا اے دِینیا،
ہیں تے تُوں مِٹھیائی والا
پر ہیں حکیم سیانا نالو نال،
ورھیاں توں مِٹھا کھوال ٹھنڈا
سڑدیاں کَوڑیاں مُونہاں نُوں ٹھار پیا مِٹھیاونا ایں“