کَملا کُملا کوئی نہیں بی بی
منگتا وی نہیں
بھائی وال اے ساڈا
مطلب ایہہ پئی میں چڑھائیاں چُوڑیاں تُسیں پیسے دِتّے
تہاڈا بھار وی ہولا ہویا ساڈا بھار وی ہولا
ایہہ آوندائے
لیراں پاکے ہتھ وِچ اِٹّاں پھڑ کے مُونہہ سر جُھوٹھے لہو نال رنگ کے
غزلاں گاؤندائے
پیسہ پُوسہ نہ منگدائے نہ لیندائے
بس لوکیں سودا چھڈ چھڈا کے ایہنوں ویکھن لگ پیندے نیں
ایہدی دہاڑی بن جاندی اے
ساڈا جس دن مندا ہووے
ہِک نوں کڑے جیہے چڑھ جاندے نیں
جیویں چوری کرکے آئے آں
ایہہ کم بڑا بے فیض جے بی بی
عمراں گال دیو پر کِسے دا ساک نہیں بندا
جس دن گاہکی چنگی ہووے سمجھو ضمانت ہوگئی
جیہڑے دہاڑے مجمع مگر نہ لگے
ایہہ ُلکدا پھردائے
میرے کول کدیں کِسے کول
اکھے پُلس پئی آوندی اے مگر میرے
لکھ تسلیاں دئی دِیاں نیں
بہو اوئے جھلیا پُلس نوں ہور بتھیرے کم نیں
کنبی جاندائے، کنبی جاندائے
ُٹکّر دیو تے اوہ نہیں کھاندا
ساری رات ڈسکنا لائی رکھدائے