فرید بھنڈار

آہندے نیں

قوالی عرب شرِیفوں آئی اے

قول1 توں بن کے

ساڈا کَول2 تے ہویا چِکڑ جایا3 پھُل

سو ساڈے بھانے

کوالی اے کَول دی جَوڑی4

اِتھاویں 5 جائی اے

کَوناں دے کُون توں نِکل جہان تے آئی اے

کُون اے بولن لئی مُونہہ کھولن

جِبھ نُوں بُلاں تے رولن

کُونوں ای کافی بنی

جیہنوں سیانے قافیئے دی ساکاچاری وِچ

ولھیٹی بیٹھے نیں

1- قَول: 1) گل بات، اِقرار، 2) لشکر- 2- کَول: کنول- 3- جایا: جمیا-

4- جَوڑی: نال جمّی، سَکّی، اِکو جیہی- 5- اِتھاویں: ایتھوں دی-

دیسی کاف اُتے عربی قاف دا

چوغا چڑھا کے،

کافی گائی کِیر1 فقیراں راہیاں پاہیاں

ہتھاں وجائی تاڑی

نچ نچ کھیڈیا حال

تے پل دو پل لئی ہوئے نہال

توڑیا مَلّ2 جنجال3

1- کِیر: عاجز، حقیر، نمانے- 2- مَلّ: مِلکھ، مِلکیت- 3- جنجال: پھندا، پواڑا، مصیبت-