پہلی واج پئی:
''چلو بئی جیہنے جیہنے حج کرنائے''
پِھسدی چھت نوں ویہندیاں
بال زال دے میہنے سُن سُن دِل نوں متیں دیندیاں
اساں سوچیا ایتھے تے کعبہ کوئی نہیں
دوجی واج پئی:
''چلو بئی جیہنے جیہنے حج کرنائے''
جِھکی منجی مُوہندے پئے اساں سوچیا
تخت ہزارا نہ ہووے
تریجی واج پئی اسیں اُٹھ کے وگ تگ نس پئے
الفیاں والے کن پاٹے سانوں نسدے تھاں تھاں ٹکرے،
اساں اِکدوجے نوں گل مِل مِل مُونہہ چُم چُم دِتیاں ودھائیاں
رَل مِل اِک داءسٹ سٹ وٹے اساں شیطان اُسارے
مُڑ اُپروں واج پئی:
اگے پُلسرات جے
ہرجی نوں اِک بھارو کرنا پوسی
تگڑیاں لِسیاں نوں آکھیا ''بھائی مجبوری اے''
کُجھ لِسے تاں میں میں کردے آپے دھوناں ڈاہ گئے
اوہناں نوں اگلیاں تھان ولھیٹے
گلاں چِ وی سی آر تے ٹیپ رکاڈر ٹنگے
کناں نوں گھڑیاں بنھیاں
جیہڑا ویہریا سجیاں ڈُھڈیں ڈھا کے اگے چاءدھریا
اِکدوجے نوں بھارو ویچ کے تگڑیاں سونا وٹیا
دینہہ ڈھلدے
اساں تِلکن ڈھیریاں وِچوں آپنا آپ پھرولدیاں
اوڑک سوچیا:
واجاں پَین پئیاں
اساں ہُن بَھجنا کوئی نہیں
ہُن سُن کے کَھلیاں رہن اساڈا حج اے
واجاں پین پئیاں