ناظم حکمت جیلوں
تینوں ٹُھونہا نہ آکھاں وِیرا؟
ڈر دے ہنیرے اندر جو رہنائیں
چِڑا نہ آکھاں؟
ہر ویلے تربھکیا پَر پھرکینائیں
سِلّے سہم دے جپھ وچ جَپھیا وِیر گنڈویا نہیں توں؟
اَگن پہاڑ دے موگھے وانگوں مُونہہ ڈراونا آپنا تینوں نہیں دسِدا
اِک نہیں پنج نہیں توں کروڑاں ہوئیوں پواڑا ایہو اے
جدوں ایالی بُکل وِچوں ڈانگ اُلاردائے
وگ تگ اِجڑ رلنائیں
وت چڑھنائیں چائیں چائیں بکّر منڈی جا
عجوبہ ہیں توں
مچھیاں نالوں ودھ کے
پانی پانی ویکھدیاں نیں جو سمندر ویکھ نہیں سکدیاں
جگ تے دھرو دھگان ہے جو سبھ تیرے ای پاروں نہیں؟
جے اساں بُھکھے آں ہارے ہُٹّے لہو لِبڑے،
جے اپنی شراب لئی
پھیہہ مِدھ کے سانوں پِیڑی آوندے نیں اگلے
تے ایہہ سبھ تینڈا ای کیتا کتریا نہیں؟
دِل آکھن تے نہیں وِیر پیارے مینڈے
پر دس کیہ کراں
نہیں تینڈا ای دوس گھنیرا؟