العشق نار یحرق ما سو اللہ
سرگزشتِ دِل فگار بی بی محبوب جہاں روشن آثار المعروف بوبو جی
الموسوم بہ عین الاخبار عرف قصہ سوائی و گھلُو
نتیجہ طبع گوہر بار الحاج میاں محمد افتخار المعروف میاں کھارا
رئیس اعظم بھیکھیکے
حال مقیم کیلے فورنیا امریکہ
(بطرز ہیر وارث)
موم بتی وی ہوسن اوہ کِسے ویلے
ایس ویلے تے بس بُتی موم دی نیں بُوبو جی
یوگا کردے جے
جینز پہن کے گھر سارا سانبھدے جے
گل کردیاں ساہ پر چڑھ جاندائے جیویں اندر دا اندر ای جانائے
میرے یار پروفیسر نوں آکھدے نیں کوئی پُھوک مارو
اینا عِلم پڑھیا کیہڑے کم آونائے
مینوں پتہ اے اُنج کِسے پُھوک نے اثر نہیں کوئی کرنا”
چُٹکی ماردے نیں
“بھار لاہ دیاں اِنج ساہ ٹھیک ہو جائے”
“تُہانوں بھار کاہدائے
اللہ واستے اینا کُجھ دیندے تے او بُوبو جی
پڑھاوندے ویاہوندے او نوکر کراوندے او”
“سارا پج اے جی بھار رکھنے دا
اندر ویکھو صندوق الماریاں
لِسٹاں نال ہر ہفتے میں ویکھنی آں
سچ دسنی آں - آہدے ہوندے او سچ دوا ہوندائے
مینوں ایہہ دوا وی نہیں پُھردی
آہنی آں سسٹم ای کوئی ہووے
بجلی چھڈ دیواں کندھاں بوہیاں وِچ
ریموٹ کنٹرول آپ باہر ٹُر جاں
پھیر سوچنی آں جِتھے جاواں گی بھار تے نال جانائے
دونویں پتر نیں باہر تُسیں جاندے او
تسیں دسو ہے اوہناں نوں لوڑ کوئی
ورلڈ بنک دیاں ایڈیاں نوکریاں نیں
پُچھاں آہدے نیں ماں کوئی شے چھیڑنی نہیں
ساڈیاں رُوٹس نیں
ملک صاحب تے مینوں طلاق دے دین جے میں گل کراں
کیش دے دینی آں
اوہ وی اوہلے”
“ہُن اللہ بہتر جاندا اے بُوبو جی
ملک صاحب وی کِسے نوں دین جے کجھ ایہو ای آہندے نیں بُوبو نوں دسیو نہ
“بس جی ایہو تے بھیت اے سیکریٹ اے کمپنی دا”
ساہ چڑھ ویندائے ہسدیاں ہسدیاں نوں
قصہ بُوبو ہوراں دا تے پتہ ای ہا
کجھ اوہناں آپ دسیا
کجھ سنیا سی لالے وزیر کولوں
چالیہ ورھے دا ایہناں دا خانساماں بیرا گارڈ اوہ
ہُن رٹائر ہو کے ادھ انھا ہو کے میرے یار پروفیسر کول آ گیا اے
روٹی کپڑے تے،
بال بچہ تے لالے دا ہے کوئی نہیں،
تنخوا ہ پُلس دی ہئی کم ایہناں دا ہا
ملک صاحب ایہہ لالہ وزیر دسدائے بڑے اتھرے سن ہُن وی اتھرے نیں
اکھے اجے توڑیں گل ہوئے نہ ہوئے
ماں بھین میری ہک کرن سیِں فرق تے نہیں کردے
بہتے چمکن تے پَولے وی مار لیندن
انگریز ٹَیم سی
نویں نویں ایہہ پُلس کُپتان ہوون گُھڑ سوار بانکے
بُوبو گاوندی سی
نواب راجے سیٹھ آوندے سن
ہِک دِن ہیٹھ بزار سِیں جلوس لنگھائے
مردہ باد سرکار نوں ہون لگ پئی
گھوڑا کھینچ کپتان نے الف کیتائے
لتاں بُوبو دی باری نوں لائیاں نیں
کجھ مِدھے گئے کُجھ گلیاں وِچ وڑے، گواچ گئے
بُو بو شربت بنا کے ہیٹھ گھلیاس
اُپر چڑھے نیں ایہہ بُوبو نال لہہ گئی
وردی وِچ معشوق سن ملک صاحب عاشق رناں تے سن عاشق مرد وی سن
عاشق میں وی ساں لالہ وزیر آہدائے
نِبھاونی سی ایس نبھا تے گئی-
بُوبو ہوراں دا قصہ میں جانناں کجھ میرا یار پروفیسر وی جاندا اے
جدوں کہندے نیں “تُسیں تے جاندے او”
پھیر لگدا اے اسیں جاندے نہیں
راتیں آپنا روگ پھرولدے اوہ
ایویں گُھلو دا قصہ سناون لگ پئے
گل روون توں ٹُری
آکھن لگے مینوں رون تے آوندا ای نہیں
کلی ہوواں بھاویں، خبرے گل کیہ اے
کڑیاں وانگ اوہ رویائے نہ گُھلو
تدوکنا چِت لگائے
گل کوئی وی نہیں سی
اوتھے لان چ پِپل سی یاد ہونائے
سک مک گیا سی واریاں دا
پِپل ویہنی آں پئی میں اوس پاسے
اوہ ایس پاسے پانی پیا لاوے
سُکی ٹہنی اُتے ویکھاں ڈُس کلا پورے پِپل اُتے
گُھلو ویکھیں نہ ایہہ، کول آ کے چُپ کھلو رہیا اے
پھیر پِھس نہیں پیا
ڈُس پیا ویکھے، رووے:
“میں قربان وے میں قربان بیلی”
ایس گل توں میں اوہنوں رکھیا سی
اُنج اوس آونا چلے جانا
ساڈا راہک جو سی
ملک صاحب نوں جدوں زمین ملی ایہہ وی پِچھوں زمین دے نال ای سی
لہور میں لے آئی
ملک صاحب نے پِنڈ پھیر ٹور چھڈیا
چور اخے
ٹھیک ای آکھدے ہونے نیں پولیس دی اکھ-
ایہہ گھر نہیں سن
چابی پِچھلے اندر دی اندر رہ گئی مینوں پھونچلی پے گئی
“گُھلو فرش تے ڈِگی اے یاد نہیں رہی
جندرا ٹچ کر بیٹھی آں”
“بھن دیواں”
“نہیں بھننا نہیں - چنگا نہیں ہوندا”
گیا بسترے چوں اِک پتری جیہی نہ لے آیا
پکی کندھ ہُن موٹی تُساں ویکھی تے ہے
ایس پتری نال ای کجھ کیتائے
پئی ویکھنی آں
نہ کھڑاک نہ کوئی جھریٹ
عجیب جیہی چُپ چان ہو گئی
ثابت صاف اِٹاں آپے نِکل آئیاں
سوٹی نال پتری ایس بنھ ٹوری چابی باہر آ گئی
اِٹاں جوڑ پلستر ایس پھیر چھڈیائے
ملک صاحب آئے تے نشان وی نہ
میں دسنا تے سی ایہدی صِفت وی سی
اکھے شکر کر آپے پھڑیا گیائے
کسبی چور ہوندے نی ایہہ خاندانی، پِنڈ ٹور دِتونیں کوئی کم کہہ کے
دل کرنا تے کدیں میں سد لینا
دِن دا دِن اوس رہ کے مُڑ جانا
جدوں آپ کدیں رات رہن آوے
سوائی نوں نال لیاوندا سی
اوہدا رنگ ہائے سوچیاں میلا ہووے
ایس عمرے وی اکھ اوہدی چمکدی اے
جدوں آئی وکھاواں گی میں تُہانوں
آپے دسدی اے
“پِچھوں ناں میرا فضل جان ہا- سوائی میں آپ کیتا
ماپے رجپوت زمیندار پِچھوں
نہر آئی تے ایہدھر آباد ہو گئے
ایہہ مُصلی ہا
مُصلیاں وِچوں وی گُوڑھا رات رنگا
تساں ڈِٹھا اے جاں تدوں دَھم گیا ہئی
ہِک دِن باہر کُڑیاں اسیں ہسنیاں
کولوں لنگھیا اے
ایویں کِھلی آں میں
نی ایہدے نال وی کوئی پرنیوسی نہ
چھاہ ویلے حویلی نہ آن کھلا
مینوں آہدائے توہیوں ہیں، ہور کوئی نہ
میں حیران ویکھاں عجب سچ ہئی
مار دیسن ای چودھری جا مُڑ جا
آہدائے مویاں تے تاں تیرے کول آیاں
لِیڑا نہ چایا میں نال ٹُر پئی
ایہہ واہی سرداراں دی ہئی ایتھے آ بیٹھے
اوہ سردار گئے تے تسیں آ گئے
ساری عمر نہیں بولے نہ پیو بھرا نہ ماں مامے”
سوائی پوری زمین ہن سانبھدی جے
دھی نونہہ میری نیویارک لے گئی
پُتر َملک دا ہران بھجوا دِتا
گُھلُو مرے نوں ایہہ چوتھا سال جاندائے