دھوبی ساڈا پُرانا ای اے
کم وِچ اوہدے فرق اچنبھا آیا اے
مَل مخولی پانی لِیڑے
مایا ہنج دی لاوندا اے،
جیہڑی پاوے ہس ہس مِلدی اے
مگروں روون بہہ جاندی اے،
پچُھیا میں اِک دن:
''دم پُھوک اے کوئی ایہہ کِسے دی؟''
آہندا اے ''میں تے کپڑے دھوندا ای نہیں ہُن،
کیہڑے کیہڑے گھاٹا گھاٹ تے
مینوں سریر ایہہ چُک چُک مارنا پوندا اے،
کیہ کرئیے
بچے پڑھاونے ہوئے
فیساں پُورِیاں کرنیاں ہوئیاں
ایہہ دھوبی اسیں چاڑھ کے بھٹھی اپنے نالوں ہُن لاہ ای چھڈنا اے
انشا اللہ،
اجے تے گھر والی اپنی دے سِر پایا ہویا اے
اوسے دی کاڑھی جے ایہہ ہنج مایا جیہڑی دسدے او''