اِک یار پرانا
لِکھن پڑھن دے آہر چ رُجھا
کدی کدی آ مِلدا اے،
گل ہمیشہ سِدھی سادی ہوندی اے اوہدی
اَیتکِیں جیہڑی کر گیا اے
جیویں کیتی اوویں سُنا دیناں،
”ساجھل جِیون
قدرت دا دِتا چج اے
جِیا جُون نُوں،
پکھو جناور منس نُوں،
جِس ویلے جگ تے مَل دا وارا آیا اے
مِلکھ واناں نُوں پئی اے بھسُوڑی
ساجھل سپ کیویں مار مُکائیے
ننگ پَیر دا دِسیا نہیں تے
ڈنگ ایہنے ماریا نہیں،
اوڑک اِکو ای ڈھنگ اوہناں نُوں سُجھیا
اسیں قوم دا کوٹھا ول کے اندر وڑ بہنے آں
وستر کھاجا رہتل رنگ اوہناں چُنے،
اخباراں کڈھائیاں
پارٹیاں بنوائیاں
تھاؤں تھائیں قبضے کرائے
قبضہ گیراں نال بِھڑن دے
طور طریقے ورتائے،
قومی لِیڈراں دی عاشقی دے
میلے لگدے آئے،
کھاتا مِلکِھیاں دا پُورا ہویا
ساجھل جِیون دی گل کرن
ہُن مخول اے“