''چھجو بنیندا چھج ہے
وڈے صرافہ کردے آہے، ہُنڈی بلخ بخارے
ساؤ اوہلے ہو آکھن 'ایس کُل نوں لائی لج ہے'
تِیل تِیل کر جوڑ بناوے تِیلو تِیل اجوڑے
ورھیاں وِچ اِک چھج نہ سَریا کیہ کماون لوڑے
کئیں آکھن ایویں پَج ہے نڈھیاں پھاہن دا
کچ دوارا کچا کوٹھا
کچے تے کچ چبارا
جَنی کھنی چَھج ویکھن آوے
ویکھن پَج پرانا آہر گھساون دا
ڈاراں آون
اَکھو اَکھ کُجھ وَتن کریندیاں
لَبھی جیویں لُکاون
جِتھاں ونجو چھجو دے چھج دا وَج ہے
چھج اَن بَنیا، ایس کیہ چَھٹیائے
کَر کَر نِت ادھوری ایڈا ناں کَھٹیائے
اساں سوچیا ٹھیکے تے سَو چھج بنوائیے
راتیں ایہدا کوٹھا چَلدائے
دینہہ ویلے پَوڑی لائیے
چھجو دے سُتیاں چڑھ کے چُبارے
بھنئیے کھیکھن ایہدا آپنا مال گُھکائیے
کُھلے بزار، اساں چڑھ گئے پوڑی
نَپ بنیرا وڑن چبارے لگے، اَوہڑی
بھاویں بلارا اپنائے چبارا ایہدا ای وجنائے
اَولوں آئی یا سمجھو غیرت دھک بنیرا ایہدا پوڑی آپنی چھڈائی
ڈَھیندی پوڑی اپروں وگایا نعرہ
'ساتھوں بنے بناتے چھج لؤ چھجو کُوڑا جے'
سَٹ پھیٹ جو لگی لگی
جَھٹ دا جَھٹ اوہ پوڑی تے جیہڑا آیائے ہلارا
آپنا چھج وجاون دا جیہڑا لیائے نظارا
پیسے پورے ہو گئے''