اج جیٹھ صاحب دا جلسہ اے
پٹے کاسنی داڑھی سُوہا نُور خطاب کریندے نیں
''ایویں گلاں بنیاںہوئیاں نیں پچھلیاں وقتاں دِیاں
بدنام کرن لئی ایس فقیر نوں
کیہڑی پُلی دے ہیٹھ آیا ہے پانی دسّو
کیہڑی تلی تے مُڑھکا
ویکھو ٹھنڈی ٹھار ہوا پئی وگدی اے
ہے اے سی دی لوڑ؟
بچہ بچہ آپ ہے اے سی
آپ ہے ڈی سی
تُساں آئے بیٹھے ہو
کر سفر ہزاراں ورھیاں دا
پسینہ آوے ای نہ ، مزدوری جیب وچ جاوے
اوہ اِنقلاب میں لے کے آیاں''
جلسے وچ اِک بَینڈ وی آیا ہویا اے
جدوں حضرت کوہِ طور
پانی دا گُھٹ پین لئی جھٹ اُڑدے نیں
چِھڑ پوندی اے طرز پرانی نویاں سازاں نال
مہینہ جیٹھ ماہیا وے پانی آیا پُلاں دے ہیٹھ
نیلے جھنڈے چائی کھلوتے لہندیوں پڑھ کے آئے
مچدا اے دو پل مُڑ ھکو مُڑھکی بھنگڑا
وت حضرت روئے روشن پِڑ ول مُڑدے نیں