رات آوے گی
تے بھاویں تُوں میں قلعے دوالے وَل کے بہہ جائیے
رات آوے گی تے سنھ مار کے بُوہے بھن کے اندر وڑ جائے گی
رات آوے گی
تے لکھ تُوں میں ون سونیاں وردِیاں پا پا نِکلیئے
اوہدا راہ نہیں ڈکیا جانا
ایڈے میرے کھلارے کیہڑا سانبھے
سر چاون نوں میرا ویہل نہیں
جے اوہ پوڑیاں چڑھ کے آوے
تے میں اوہدے چڑھدیاں چڑھدیاں شیشہ ویکھ لواں
رات آوے گی
تے بھاویں تُوں میں باہروں ٹاہراں پئے مارئیے
"بوہڑیو لوکو نالدے گھر اگ لگ گئی جے"
ساڈی کِسے نہیں سُننی
رات آوے گی
تے آن کے اوہ چن چاڑھے گی جیہڑا دنیا ویکھے
لکھ توں میں دِیوے بال بال درگاہیں دھرئیے