فرید بھنڈار

تاکی وِچوں باہر ویکھناں

دُدھ چِٹیاں پُھلاں والی کچنار دِیاں

بانہیں بھنّ کے ہیٹھاں سٹیاں ہوئیاں نیں

ساہمنی وڈی کوٹھی دی بال کھڈاوی مِھیداں

لاہ لاہ کلیاں پراتے پئی دھریندی اے

چِھینا مالی وڈھی اے جن کچنار کُہاڑے نال

اوہ وی ایسے آہرے جُٹیا ہویا اے

تے شَوکے خاں ترکھان وی

جیہڑا آری نال بانہیں دے ڈکرے کر کر

بالن پیا بنیندا اے،

باہر کھلو میں کُوکناں:

''کیہ پئے کریندے او

خُدا دا خوف نہیں تُہانوں؟''

مِھیداں سَینتر وڈی کوٹھی ول کریندی اے

''بیگم صاحب دا حُکم اے

بھاجی ایہہ اج دوپہر دے کھانے لئی اے''

''اِک سالن لئی رُکھ تُساں وڈھ کے ادھا کر چھڈیا اے''

کچنار لفظ دِیاں ارتھاں 1 دی ونگی2

ارتھالِیاں 3 وِچ وی ویکھی ہوئی اے

رُکھ تے ہے ای

کچ نار وی اے، کُوڑی رَنّ

کنچنی4 پَت ہینی5،

سو ایہناں بھانے کچنار طلاقی نار چنار دی ہووے متاں

دو سو ورھے جوانی ماندا پربت6 موہری7

وڈی کوٹھی والیاں دا مجمان8 جیہڑا تِھیندا اے

جدوں اُنھالے9 اوہ پہاڑ تے جاندے نیں

1 -ارتھاں = معنیاں - 2 -ونگی= ورائٹی، ون سوَنّا ہوون-3 -ارتھالِیاں = لُغتاں، ڈِکشنریاں -4-کنچنی= کنجری-5 -پت ہینی= پت (ساکھ عزت) توں بِنا-6 -پربت= پہاڑ-7 -موہری= آگُو-8 -مجمان= میزبان، ہوسٹ- 9 -اُنھالے= گرمیاں دے موسم وِچ-