سُکے چکڑ وال
ڈبو ڈب سریر
لیر لنگوٹی
مٹھ پٹھیاں دی پھڑی کھلوتائے
پیدل رکشے ٹیکسیاں کاراں
اوہدے کولوں لہرو لہرو گیندیاں نیں
کوکے کولے دیاں سکھنیاں بوتلاں ہار
پٹے تے ہوا سوار
سیونی اسیں ماہی مناون چلیاں
سکے چکڑ وال
ڈبوڈب سریر
لیر لنگوٹی
مٹھ پٹھیاں نوں تکدائے
اگ بجھاون والے موگھے وچوں
سمدی تراوت مَل کے تلی تے
پٹھیاں نوں وتر دائے
میں نیڑے ہو کھلوناں تے مینوں ہولی دتی آہندائے
رتا کو اوہلے ہو جا تینوں ویکھ کے سنگسی
"کون ؟ میں اینویں پچھناں
ہولی دِتی گُڑھکدائے
ویلا ہو گیائے آون دا
کدیں میل نہیں ہویا –سنگسی"
میں رکشیاں ٹیکسیاں پیدلاں والی لہرے لڑھدا
دفتراں ہٹیاں اندر مونہہ ملاحظے بھردا
ودھدا تھڑدا
گھنٹے ڈیڈھ نوں مڑ کے اوتھوں لنگھناں
سکے چکڑ وال
ڈبوڈب سریر
لیر لنگوٹی
مٹھ پٹھیاں دی پھڑی کھلوتائے
میں مڑ نیڑے ہوا جکناں
کن میرے نال مونہہ میلدائے
"سنگسی رتا کو اوہلے"
اجے نہیں آیا ہاسے بھانے میں اینویں پچھناں
اوہ اچیتیں سینت مار مینوں لا نبھے کردائے
دوجے پاسے ویہند اوِس جیہا جاندائے
اوڑدھوانکھے انبر چوں جیویں ہاٹھ نسرے
بکیں دھر کے گھاہ
گوڈیاں پرنے ہوندائے
اکھاں چوں گڈ پگھر دی اے
ہنڈھیا جیہا اک کھوتاہولی ہولی آوندائے
سہجے آن کے بُکوں پٹھے چُکدائے
میں پچھناں ،،ایہہ کیہدائے،،
اوہ آپ دھیانے کھوتے نال جیویں گوشہ کردائے
"کون کیہدائے دس کون کیہدائے"
ساہمنی ہٹی اندروں کوئی جنا جنانی
ڈبے تھیلے چاوندے بال ولاوندے
کارچ بہہ جاندے نیں
رکشیاں ٹیکسیاں پیدلاں والی لہرے لہہ کے
اکھوں پروکھے ہوویندے نیں