فرید بھنڈار

شاہ حُسین کالج اِک اُچیچی اُسرگ ہے ساڈی رہرِیت دی وار وِچ- شاہ حُسین کالج دا سارن جھویا گیا 1969 وِچ- کیوں تے کیویں، آؤ ویکھیئے-

اسلامیہ کالج لہور نُوں ایم اے دی پڑھائی واسطے تھاں دی لوڑ پئی- ضلع کچہری ساہویں ڈی اے وی کالج دی چھڈی عمارت کالج والیاں اپنے ناں کرا گِھدی تے اُتھاں پڑھائی ہوون لگی- اَیرک سِپرِئین انگریزی سلیکھ پڑھاون لگے تے منظور احمد چیت وِدیا- نال اوہ کالج پڑھاک سنگیا دے پردھان وی آہے- حُسین نقی انگریزی سلیکھ دے پڑھیار سن تے نال کھبے دھڑے دے نیتک کمیر وی-

کالج دا پربندھ انجمن حمائیت اسلام دے ہتھ ہا- اوس ہتھ نُوں ایہہ تریوے جی بہوں چُبھدے آہے- اوڑک انجمن والیاں ایہہ کنڈا کڈھ دِتا- تریوے جی کالجوں کڈھ دِتے گئے- اُستاداں سوچیا ٹیوشن سینٹر کھولنے آں - حُسین نقی نے اپنے بیلی شفقت تنویر مِرزا دا رچیا انت “شاہ حُسین کالج” اُستاداں نُوں پڑھایا- ہور وی لوک رلے تے کالج وِڈیا گیا- پروفیسر منظور احمد نے اپنی رہائش دی تھاں دا ہیٹھلا انگ کالج نُوں دے دِتا تے رہائش اُپرلے انگ وِچ رکھی- منظور ہوراں دا ایہہ مکان کچہری دے پِچھوں وگدی سڑک تے ہا- (ایہہ اوہا سڑک اے جیہدے اُتے باوا فرید دا ڈیرا اے)-

اَیرک سِپرِئین مینوں آکھیا اُتھاں انگریزی پڑھاون دا- میں پڑھائی شاہ حُسین کالج دے متے مُوجب جھوتی- انگریزی جوڑاں دا ویروا لوک بولی وِچ کیتا- اِک گبھرو پڑھیار تُرت اُٹھ کے باہر نِکل کھلوتا- میں باہر جا اوہنوں پچُھیا کیہ گل اے- آکھن لگا میرا سِر پیا چکراوندا اے- اکھیاں اگے تارے پئے نچدے نیں - میں پچُھیا کیوں ہوئی اے ایہہ- اکھے اسیں تے آئے آں انگریزی سُنن بولن- پنجابی دے گند نُوں چِت چیتے وِچوں ہُونجھ کے صاف سُتھرا نواں جِیون جیون لئی- (میں اوہدے نال گل لوک بولی وِچ کیتی- اوہدا ولدا انگریزی رلائی اُردو وِچ ہا-)

میں اندر پرت کے پڑھائی مُڑ جھوئی- ہولی ہولی پڑھیار کِردے گئے- دو کُڑیاں بیٹھیاں رہیاں - اکھے پڑھاؤ تُسیں - اسیں پنجابی وِچ ای پڑھ وِچارنے نیں ایہہ جوڑ- سواد آیائے سانُوں - اوہناں دونہاں دے وڈکے نیتی تے سلیکھ دے جانے پچھانے سُوجھوان آہے-

مُڑ ایہو صلاح بنی جو اجے پُرانے ڈھنگ نال ای کم ٹوریا جائے تے نویں رنگ لئی کوئی آہر سوچیا جائے- سو پڑھائی چالُو ہوئی- میری لوڑ تے ہُن نہ آہی- چھڈ کے گئے سارے پڑھیار پرت آئے- ہور وی آون لگ پئے-

پروفیسر منظور احمد اپنیاں سنگیاں نال مسلت کر کے لارنس روڈ تے سینٹ اَینتھنی سکول لاگے اِک تھاں کرائے تے گِھدی- شاہ حُسین کالج اوتھے آ گیا- چار پنج کمرے، کُھلا ورانڈا تے اگے کُھلا ویڑھا، وِچ گھاہ بُوٹ- نویں اُدم نال پڑھائی ہوون لگ پئی- یونیورسٹی ولوں وی کالج دی منظوری آ گئی-

کھبے دھڑے دے اگُونہے سُرتِیل گُنی شاہ حُسین دے ناں نُوں مَل ویہاروں نابر ہوون دا نشان مَندے سن، سو شاہ حُسین کالج نُوں نویں رنگ لگن لگ پئے-

گاون وجاون، وچار منڈلیاں، نِکے نِکے کھیال- رونق ودھدی گئی- ایم اے پنجابی دی پڑھائی ہوون لگ پئی- مینوں ایس کم تے لایا اَیرک سِپرِئین- وت بُھٹو حکومت آ گئی- سبھ سکول کالج سرکارے گئے- شاہ حُسین کالج مُک گیا- پر نہیں، مُکیا کدوں - سرکاری ڈھال وِچ ڈھلنوں تھیا اے انکاری، آکھو، رنگ وٹاء کے اپنی کار وِچ جُٹ گیا اے-