کل اساں گئے ساں اوس بزار
لنگھ پھجّے دیاں گڈیاں مشہوری1 پاویاں کولوں،
پنجاہ ورھے جو پہلوں ہا
اوہ تاں نہ ہا ایہہ بزار
پُورے بزارِیں اِکو جنی دِسی
اِک ریڑھی والے کول کھلو کے گل کریندی
جی کیتا
کر پاسے ایہنوں پچُھیئے
کیوں بیبی
ایہہ جاء اوہا ای اے
جِتھاں آ اساں پچُھنا ہا
گھر کیہڑا اے تائت بائی دا
اوہ جنی اگیرے ہو آہندی اے
”میں آں تائت بائی
دسو کیہ چاہیدا جے“
آکھیا اساں
اوہ جو سانُوں کر دیوے اوہ
جو ہو نہیں سکے
آہندی اے کر اکھِیں چار
”جاؤ ہو گئے او“
1- مشہوری: ایڈورٹِزمنٹ-
پچُھیا اساں کیویں ایہہ سانُوں اندروں سہی تِھیوے؟
آہندی اے ”ہر پل ایس جہان نُوں
اوہا کرن وِچ لاؤ
جو ایہہ ہا تے ہُن نہیں اے“
اِک دم جاپیا سانُوں ساہ اساڈا
مُڑ پتراں ول ویہندا1 اے
اُتھاؤں ہو نواں
اساڈے اندر پیا لہندا اے
سُنی پڑھی تے چروکی آہی ایہہ
اج ورتدی سہی تھئی اے پہلی وار
جاپے نہ دھرتی اوہ اے جو آہی پیراں ہیٹھ اگے
نہ پَیر نیں اوہ جیہڑے اُپر آہے
سنگی ہو اوہدے
1- ویہندا: جاوندا-