کالیا وو کَرماں والیا وو
آگُو آگُواں دا
مُکھ بھولا تینڈا سرل شِیشہ
بندیائی چوں تینڈی کُجھ کجدا نہیں،
نیتر ہِینیا باویا آویا وو
ایتھے بیٹھا کریناں میں آہر پیا
تینڈا چِتر ساراں کانی آپنی نال
واہے آپنے تے مینڈی دِھیر ناہیوں
پیا پُچھناں
کیویں میں کتھ لِکھاں
کیہا دم ہا تینڈے رَل گاونے وِچ
رتے پانی گھتے
جیہنے سنگھنے جال اُدھیڑ سَٹے
اوتھے لُٹ لئے اوہناں نین تینڈے
1-Antar Sudan Katara Mberi
پورا جُگ لایا
تک تینڈی اتول اوہ نہ روک سکے،
کالیا وو
سانجھ ورت یارا
شرماں والیا وو
واہ رنگسی کون تصویر تینڈی
سدا اُبھردی چَھل
لِیکاں جِھینیاں کون اُلیک گِنسی
متھے تینڈے تے جیہڑیاں کُھرچ دھریاں
بندی خانے چ بِھیڑیاں اَٹھ ورھیاں
تُوں جو اوکڑاں ڈِٹھیاں گُجھ نَینِیں
دِل قلعے وِچ آپنے سُرت بُرجیں،
مناکھیا وو
ماہی لاکھیا وو
سانجھ ورت اگوان
کمیر سُرجن
کون کھٹ سہیڑ کِتھے ڈھو کھڑسی
مَیرے سُچڑے دا واہن ان واہیا
توڑو توڑ وِچھیا
وِچ تینڈیاں انہد بُتیاں دے،
ترُٹ پربتاں چوں پتھر کون آسی
صورت تینڈی گھڑا صورت آپنی چوں
پرت ٹُھک پہاڑ دے وِچ جاسی
اَمر کرن لئی تُدھ مَر جِیوڑے نوں،
وار کار کیہڑا
تینڈی وار ان لکھی نوں جوڑ لِکھسی
رنگوں ہو بے رنگ
تینڈِیاں گھوٹِیاں گھول پیاوسی ساڈیاں ہِردیاں نُوں،
مناکھیا وو
ست راکھیا وو
میں وی ڈُس دوپہرا نکلیاں جاں
سیکی تینڈی سیان دی دُھپ میں وی
پوہیاں اُنگلاں تینڈڑی رشم دِیاں
واء تکدیاں پَتِیاں مینڈیاں نوں،
چِترکار تے اِک میں بھال آندائے
تینڈا ورھیاں دا گھول جو سہج رنگے،
ناڑِیں تینڈیاں وِچ سردی رَت جوگی
کانی بھالناں پیا
جگت بِرچھ جیہڑی رَل گَھڑ لِکھن
جگت نِیر دی دھار دوات کر کے
جَڑاں لِکھی دِیاں ست کھنڈ سرن،
کانی بھالناں جو
وِینی تینڈی وِچ دھڑکدی سار ساڈی ٹوہ اُلیک سکے،
سیاہی بھالناں پیا
کالے لوہو دی لاٹ جمائی اے جو
میل گھول دے سیک پکائی اے جو
نین نقش آ تینڈے کتیب دیوے،
اکھیں مینڈیاں نوں ہُن لوڑ ہوسی
ہِین ہتھاں چوں رِسدے پگھراں دی
جُڑ ٹِھلدے سنگاں دے اتھراں دی
ورھے وترے جیہناں وار ساڈڑی دے
نویں جُگ دی وار اُگاونے لئی،
نیتر ہِینیا وو
ویکھنہاراں دی سار سنبھال ہیں تُوں
سانجھ ورت توہیوں کالی کال ہیں تُوں
ہانی مینڈے وِنی
تینڈی پوکھ گھنی
ایہہ کافی گل ہے وِنی نال کالے امریکی جوڑک انٹر سُڈان کٹارا مبیری دی- وِنی پیار دا ناں سی ہنری وِنسٹن دا- اوہ 1911 وِچ مِسِس پی (امریکہ) دے اِک اَت ماڑے کالے کمیر میل گھر جمے- پیسے دی سوڑ نے سکول وی پورا نہ کرن دِتا- پر اپنی سُرت تے اُدّم پاروں ماڑیاں کمیریاں دے سیاست دے پِڑ وِچ لتھے- تے سانجھ ورت جُوڑی (کمیونسٹ پارٹی) دی سیوا وِچ جُٹ گئے- دُوجی جگت لام وِچ اپنی جُوڑی دیاں ہور ساتھیاں نال فوج وِچ گئے- نازی دھگان نال لڑن- لام مُکی تے مُڑ سانجھ ورت آہر وِچ رُجھے- حکومت دی پکڑ توں بچن لئی کُجھ ورھے گُجھے رنگ وِچ کار کریندے رہے- پر 1954 وِچ جیل بند کیتے گئے- جیل دی سختی نے اوہناں دی نظر تے گوا دِتی، پر سار تے ہٹھ نوں سگوں ودھایا- 1961 وِچ رہا ہوئے- 1966 وِچ سانجھ ورت جُوڑی دے مُکھ چُنِیجے تے 1986 وِچ اخیرلے ساہ تائیں کم وِچ لِین رہے- اوہناں کالیاں دے حق دے جَتن نوں سانجھ ورت دے موکلیرے گھول دا انگ بنایا- ہنری وِنسٹن دا کم اوہناں دِیاں لِکھتاں وِچ وی اے-