توتے ذات اسیں
دُھوتُو ہوئے تینڈے،تینڈے وڈیاں دے
سانوں پُچھدائے لوک تینڈی شان بیاں اسیں نشر کرئیے
تن سبز کیتا وردی شرع تینڈی پٹہ لال گل تینڈڑے عشق دا اے
ہُد ہُد نام تینڈا
تینڈا دیس کنعان ایران مصر
سُلیمان دا تخت مقام تینڈا
گھیر صبا نوں سیج بہالیو توں
بولی شاہاں دی توں تینڈی شاہ جانن
شاعر صوفی حکیم عطار جیہے رکھن سار تینڈی
ایتھے آن بیٹھوں
ایہہ گوار واسا
کمّی کر بنیرے بہالیو نیں
"چُنج لمّی آ چَکّی مینڈی راہ دیویں"کوئی آکھ گئی
ٹوڑا بیہا تینڈے موہرے سُٹیا سُو
پِنڈ پِنڈ پھیرے
دانے ہاڑی ساؤنی
پتھر راہوندی چُنج تینڈی کُھنڈ ہوئی
پیر ویلا ہور ہویا
لگے جندر گُھراٹ نہر نالیاں تے
پِنڈو پِنڈ چلی چَکّی تیل والی گُھگو گُھوہ بولے
موئیاں گُھگیاں نظر منظور ہوئیاں
چڑھ چودھر چُباریاں ہال پاون
"یوسف کُھوہ
یوسف کُھوہ"
جُتی تینڈی ایہہ جانگلی کوجھ ناپاک جانن
کتھوں حسن لیا کیہڑے چاہ پیا
وکیا کیوں زلیخا دے مصر گیا
جد پُشت دا راز ایہہ خاک جانن
تینڈی چُنج آہی
شجرے ٹُھونگ جِس شجر گُلزار کیتے
تینڈی چُنج آہی
کھول سان کتیب جیہنےدھری اے شاہ سُلیمان موہرے
تن من خلق دے رگڑ تلوار کیتے
بھرتی فوج پیادے اسوار کیتے
ایتھے اُٹھ آئیوں تینڈے صبر دا ایتھے امتحان گویا
پھیر اوہ دینہہ آئے
جاتا تُدھ ویلا ہُن پچھلے پیریں ہے مُڑن لگا
دل ایہہ آئی تینڈے اُف وطن چلیئے
آئی آواز نہیں،وطن ہے سارا جہان تینڈا
ہندوستان تینڈا
چین و عرب وی سنے جپان تینڈا
گُجر جٹ رجپُوت سُن ہوئے موہرے
"بہو سرکار ایہہ دیس تُساڈیاں گولیاں دا
ڈھیر قدماں وچ ہوئے اسیں باز شِکرے
شہر و شہر گڑگج ڈھنڈوریاں دا:
"چکی راہ نہیں خان چکیر خاں ولد بھمیر خاں جے
کلغی تاج مِنو
نیزا چُنج ماپو
تج چَک جگیر فقیر ہویا
سجدہ سہو کرو سید سوہنا جے
جے کر منت مُراد کوئی لوڑدے ہو
سوئن چُنج چڑھاؤ حجیریاں تے
توتے ذات اسیں ڈھاڈی بھنڈ تینڈے
تینڈی آل اولاد دے
پِھٹک جوڑ شریکاں دے مُونہہ ماری
تینڈیاں پیراں وچ جس قالین کھولے
سَتاں پُشتاں توں آس ہاں لائی بیٹھے
ہادی ہُد ہُد ہدایت سِر چھت ساڈا
پِیر ہویا اے وزیر وی ہو جاسی
کرے ہُد ہُد نوں نوں چشم تے گوش جیہڑا
سالک راہ اوہ سچ خرگوش ہوندائے
حق پاؤندا اے
آپ ہو حق مُڑدائے
ہِکا گھر وسن دین دُنی تاں ایہ جہان ٹُردائے