نامی موچی اپنی روز دی جاء تے بیٹھائے
تَھیلا آیائے
جُتی لاہ اگیرے کیتیوس ‘‘تروپا مار دیویں نا’’
‘‘بہہ جا چودھری کالھ ای؟
تَھیلا بہہ گیائے
نامی جُتی ویکھدائے
‘‘نامییار ہک گل میں پُچھن پُچھن کریندا رہناں’’
‘‘پُچھ لویں ہا’’
‘‘ویہہ ورھے تے مینوں ویہندیاں ہوئے نیں تینوں
ایسے ہکا تھاں تے بیٹھائیں
مینوں ویکھ نا
رَکڑّ واہی، پَھنڈراں چوئیاں
بَدِھیاں کھولیاں پار لنگھائیاں
کُھلِیاں کُھرلی ڈاہیاں
جیل بھوگی کدیں لائی نیائی ہو گئے
توں صدیاں دا اوسے بوری بیٹھا
اوہا گنڈھ ترُپ کریندا اَکیا ناہوں’’
نامی ہسیائے تروپا بھردا
‘‘جُتی پیرو پیر نویں او چودھری تھیلا
جیہڑا پیر پٹیندی اے اندر لِکھ لیندی اے
جیہڑے چاڑھی پِھردے نیں اوہناں نال الیندی کوئی نہیں
سانوں آن پڑھیندی اے
جُتی چوں نِرا پیر نہیں دِسدا مونہہ وی دِس پوندائے
تے ڈِھڈ وی
کیہ کر آیائے کرن کیہ چلیائے
کیہہ دینائے کیہہ لینائے
ڈر ماڑے دا ہر کوئی ویہندائے
ڈر ڈاڈھے دا جُتی
جُتی شیشہ ای نہیں چودھری پوتھی آ جوسی دی
کتنے پیر کسے پٹنے نیں ڈھے جانائے
ایس بوری تے بہہ ویکھے سو جانے
نالے جُتی جیہڑا گنڈھیندا اے اوہ نالو نال ای ویہندا اے
کیہڑا تروپا ہووے جیہڑا ننگیاں پیراں نوں گنڈھ جائے
اَکّے تھکے کیویں چودھری؟’’