روز سویلے باغ چ میں
اوہنوں پام2 دا ہونجا پنی
اوسے اکو رُکھ پال3 دے ہیٹھ کھلوتا
سُکے پتر ایہدھر اوہدھر کردا تکناں
آوندے جاندے مالی چھوہر اوہدی چھِجی لکدی4 ٹھونگدے
اوہدیاں ہڑبیں وڑیاں گلھاں پٹدے
اوہنوں ماسی پُھوڑھ سدیندے نیں
چکیاں تمبیاں والے بپاری
افسر لمکیاں نکراں والے
گِن گِن سیردے گیڑے پورے کردے کولوں لنگھدے نیں
اوہ اُڑیا5 اُڑیا کڈھ کڈھ لمے ہتھ سلاماں کردا اے
ہر پھیرے اوہدے کول میں ہولی ہوناں
اوہ چور اکھیں ویہندا
اکدو لفظ بُڑا کے پتر ایہدھر اوہدھر کردا رہندائے
ہر پھیرے میں ہولی ہوندا
اک ادھ گل اوہدے ول ریڑھناں
"ایتکیں مینہہ نہیں پیا"
"پے جُو"1
"پتراں تے دھوڑ بڑی اے"
"دُھپ جُو"2
اج وڑ دی واری میں آکھیائے
"چیتر چڑھ گیا اے"
اوس گولیا نہیں
میں تیز ہو گیاں
جاندے پھیرے ہولی ہوئیوں بنا ای آکھناں
"اجے سُکے پتر نہیں مُکے"
اچن چیت اوہ ہونجا سٹ کے
ڈِھلیاں بُلاں چوں ننگے بُٹ وکھالدا
سدھا ہو گیائے
"'چیتر چڑھ گیا اے'
جِن پڑھیا نہیں اوہنوں چڑھیا نہیں
جیکوں ساریاں رُکھاں دا اکو چیتر ہووے
'چیتر چڑھ گیا اے"
گھرسپرتدیاں مینوں اج اچیتیں سہی ہویائے
مینوں چور اکھیں ویہندا
اوہ جیہڑے لفظ بُڑاندا اے'
اوہ"کوپنی باگ"نیں۔