گِٹکو میرا نک مروڑ کے آہندائے
''توتا ٹُوں اوں''
میں آکھنا ''گٹکو توتا ٹوں کیہ مطلب''
''مطلب ایہہ کہ توتا تُوں''
''میں؟''
''توں''
''اوہ کیوں''
گِٹکو میرے کُنڈھے نک تے چِیچی پھیر کے آہندائے
''تُسیں توتے نہیں تے ایہہ پھیر کیہ جے''
''بڑا سُور ایں گِٹکو تُوں''
میں گِٹکو نوں کُت کتاڑِیاں کڈھناں
''میں سُور نہیں باندر آں''
''توتے دا پُتر باندر کیویں ہو سکدائے''
''جیویں تیرا پُتر میں ہو سکناں''
''تُوں باندر کیوں ایں ببر شیر نہیں؟''
''بس مینوں باندر چنگا لگدائے
اوہدے پنج ہتھ تے پنج پیر جُوں ہوندے نیں''
''پنج ہتھ تے پنج پیر؟''
''آہو دو ہتھ دو پیر تے پُوچھل پنج ہتھ
دو ہتھ دو پیر تے پُوچھل پنج پیر''
گِٹکو دی ماں مینوں سویرے آہندی اے
''دِن دا سُکھ نصیباں وِچ نہیں
ہُن رات وی بندہ نہ ای سویں تے چنگا اے''
''کیوں خیر اے؟''
''ساری رات مینوں خاب آئی اے
تیرے وال تے داڑھی ودھ گئے نیں
میں وِچوں دھولے گِننی آں
چار جنے آئے نیں قلعیوں
چونہہ نے ووضو کیتے ہوئے نیں
چِٹے کپڑے، جناح ٹوپیاں
تازیاں پالش کیتیاں چپلاں
تیرا پُچھدے پھردے نیں
کِدھر گیائے اکھے
سِدھے سادے بندیاں نوں اوہ پُٹھیاں پٹیاں پڑھاون والا
مزدوراں لوکاں نوں راج کرن دی چوبھڑ لا کے
حق حلال دے راہوں ہٹاون والا
کِدھر گیائے اوہ
کھکھراں تھلے دھوئیں ڈاہون والا
میں نہیں دَسدی
آہندے نیں آپے لبھ جاندائے
تُوں چل کھاں ساڈے نال قلعے
ہولی ہولی
اوہناں دے میں مگرے ٹُردی جانی آں
دند تے وال میں اِک اِک کر کے
سڑک تے سٹدی جانی آں
اوہ پرت کے مینوں تکدے نیں
تے ڈر کے نس جاندے نیں
دند تے وال میں پِچھلے پیریں لبھنی آں کاہلی کاہلی
نہیں لبھدے
بڑا ہنیرائے
تیرے کول میں آونی آں نس کے
تُوں وی مینوں نہیں سیاندا''
''مینوں وی اِک خاب آئی اے راتیں
پر اوس خاب وِچ اِک توتا وی آوندائے''
گِٹکو میرے نک تے چِیچی پھیر کے آہندائے
''کوئی گل نہیں آون دے''
''کُت کتاڑیاں نہ مینوں کڈھیں''
''نہیں کڈھدا''
''توتا منجی ڈاہ کے سُتا ہویائے دُھپے
گِرج اوہنوں اُتوں تاڑ کے تھلے آؤندی اے
اوہدی بیٹھ سرہاندی گاوندی اے
توتیا من موہتیا اُٹھ چوری کھالے
ساری رات دا جگیا توتا اُٹھدا کوئی نہیں
گِرج آہندی اے بس ٹھیک اے
ایہہ تے پک گیائے
بسم اللہ کر کے گِچی لمی کردی اے
تے توتا آکڑ بھن کے باندر بن جاندائے
باندر گِرج نوں گِچیوں نپ کے
ٹاہلی اُپر چڑھ جاندائے
اکھے آ تینوں اُپروں توتے کھواواں
اُتوں گِرج دی سِری مُرنڈ کے جھٹ پٹ سٹ دیندائے
اوہدا چِٹا سُوٹ تے کالا بُرخا ٹِیسی اُپر ٹنگ دیندائے
پُوچھل دی پھیر پینگھ بنا کے
ٹہنی ٹہنی جُھوٹدائے
اوہنوں ویکھ کے توتے ہور وی آوندے نیں
اِکدوجے نوں آپنی خاب سُناؤندے نیں''