ساڈے ہار بھائیا ایہہ وی آہے بندے
کدیں ہتھ دی کیتڑی کھاوندے آہے
آپ ہاریو نیں جُون بندیاں دی
ہک ہتھ دی کیتڑی ہک دانا
لکھاں کیتیاں جُڑیاں ڈِھگ لگے
ہو ورتاوڑے ڈِھگ نگھاریونیں
ہتھ ویہندیاں ویہندیاں ڈنگ تھی گئے پیر پَھن تھی گئے
کُنڈل پیڑھیو پیڑھی خزینیاں تے
ٹوئے ٹبے کراہ اساں رکڑاں واہیاں بھوئیں تُھلی
وچوں نکل کے ایہہ ساڈے مگر بَھنے
پگاں سٹیاں بھجدیاں اساں راہے
وت گل دی تیڑ دی سٹ بھجے
ڈھیندے اٹھدے وت وی واہوندے رہے
ڈنگ کھاوندے رہے
ساڈیاں لَتھیاں لاء ایہہ بنے بندے
کھسم ہو چڑھے ساڈیاں واہیاں تے
اسیں وِس پچاوندے ناگ تھی گئے
اسیں مگر آن ہن‘ اگے لگ گئے نیں
اسیں لجدے ساں ایہہ لَجدے نہیں
سٹ نکلے نیں سو سو تھان پگڑ
ساڈیاں لتھیاں جوڑ جو آہے بنّھے
پہاڑ پگڑاں دے اساں کُھوہ کیتے‘ وت رلن لگے
سو سو ہتھ جامے
عطر بھنڑے
سو سو ہتھ سُوتھے
تیڑوں پار وگا ایہناں راہ ڈاہے
چاگھاں للکراں نال ہک دوجے دا ننگ پئے کجدے نیں
کِدے بَھجدے نیں
رنگ رنگ دے تھان جے جُڑے پئے نیں
کوہا کوہ ہن واہن وی جڑے پئے نیں
بھائیا وَیر دی وار نہیں اساں لینی
ہک کُھسڑی جون ویاہونی اے