فرید بھنڈار

سگّھو ملنگنی تے ساتھناں دا

رو نہاریاں واٹاں وت اساں

مَلّ1 نُوں مَیل سُنجاتا،

آکھے لوک ملنگنیاں،

لانگھے2 اُلانگھیاں 3 نُوں کرن ای ہُن ساڈا سانگا4 اے،

ایہہ مالک سوکے5 دے

مَد6 ساڈی پِیڑ7 چروکے ڈنجھاں لاہوندے آئے

مُوتر سُوتر ہو،

اَنھیاں کُھوہاں وِچ بوکے وگا کے

خلق ولاء کے ورَن8 وَرانا9 دھرم پُجاوندے10 آئے،

1- مَلّ= 1) مِلکھ، مالکی، ملکیت، 2) مَیل، عیب، بج- 2- لانگھا= عام رستہ- 3- اُلانگھا= رستہ جِتھوں لنگھن دی مناہی اے (اُلنگھن= نابری کرن، قانون توڑن)- 4- سانگا= رشتہ، لاگ، تعلق-5- سوکا= اوڑ، خشکی، پانی دی تُھڑ- 6- مَد= 1) شہد، شراب، 2) خوشی، 3) رس- 7- پِیڑن= 1) دباون، ویلن، رس نچوڑن، 2) دُکھ تکلیف دیون- 8- ورن= جاتی، کاسٹ، ذات- 9- ورانا= 1) اوپرا،2) اوپرا کرن والا- 10- پُجاوندے= پُوجا کراوندے-

کُجھناں نُوں گنڈھ پرو گل پاون

گھنیاں نُوں کَٹ وکھراون1،

ہُن اساں اوَرناں 2 ورھنا اے

جڑھ سار پروار نُوں چڑھنی اے سَلّھ اننتر3 رتّی4

ورانِیاں 5 ہر ہو6، سوکا ہَر7 تَر8 کرنا اے

1- وکھراون= 1) اِک دُوجے کولوں وکھرا کرن، 2) سودا بناون- 2- اَورناں = جیہناں دی کوئی جات نہیں – 3- اننتر= اَنمُک، لگاتار- 4- رَتّی= لال، لہو رنگی- 5- ورانیاں = جیہڑیاں اوپریاں ہو گئیاں نیں – 6- ہر ہو= ہر ہو کے، ہر اِک ہو کے- 7- ہر= کھوہ کے-

8- تَر= گِلّا کرنا اے (سوکا ختم کرنا اے)-