"سَین بھجالے ریڑھا"
"تیرے ہتھ وچ راساں ڈولن بابا جان دے
کل تیرے آکھے لگاں چاچے ماریائے
اکھے سو رپیہ بھروتاں ریڑھا چھُٹدائے
ددھ سوختے شہر نہ پجا باندھاں کھنجسن
اکھے دو واری کوٹھی لگا اجے نہیں رجدا
ایہدے گٹھ گٹھ دہیں بھروٹے بشرمی بال دی
ایہدیاں لتاں بھن کے منجی اُتے پاوساں
جیہڑے دیہوں یبھناں سو سانوں بج تاں لاوے نہ"
"اسیں آہو سور آں –سانوں ساوَ تھکدے
ساڈا ناں ای ووضو توڑ گھر ستی والاں نوں
تیرے پیو دا اندر تھندا مدھانی لب دی
ایہہ رن ولٹو ہی بھر بھر شہر یں پھیر دائے
ریڑھا سین بھجالے ککھ نہ رہسیا
یاری رزق کماونہار دی ٹاہنی امب دی
کوئی ساج سکندر لا کے باشے پندے
کوئی مل ڈیوڑھی ٹنشن مچھ سوار کے
جنھ چایا مُول ملاحظہ لاہادیوسی
سبھ کارو یہار مصلے چوری یاری دے
نہیں کر کن داڑھیں زہری لقمے چوپڑے
سبھ چائیں چائیں ملن لیف ادھرنگ دے
ریڑھا سین بھجا لے
ہتھ نپی راس بگانی ہو جاوَ کھسریا
ساڈی اکھ پرانی گہری سرمے لائے نہ
اساں دلنے پونے جیہناں رَسائے ویلنے
اساں ڈھاونے ٹانڈے جیہڑے ترکڑ جھوٹدے
سانوں گورے دے تنخواہی سپاہی سُنگھدے
سانوں ذیلداراں دے ڈھول چوپھیرے مخبری
سانوں چھڈ بلارے تاڑن راٹھ کرائے دے
پر مڑن سور نوں ڈبن مہیں نوں میہنا
ساڈا شوہ بالڑا ایہنوں دلیلاں پوہن نہ
آکھے جد تائیں ٹھانے رہسن لُٹ کے کھاونا
اساں جد تائیں ساوَ جمسن سُور سداونا
ایہہ ٹھنڈی شڑک کھرینڈھ آ میری ہک دا
اساں تھینا تدوں نروئے جدوں ایہہ اُدھڑی
ریڑھا سین بھجالے نہیں تاں وڈھ چھڈوں
سُوراں وچ نہیں دو ہتر پوتر ہووندی
اُٹھ جیویں بھجالے ریڑھا جاندی بہار دا
مینوں کافر کر کے مار نہ میریا ویریا"