اج لنگھیئم کِکری کولوں
بھری پرات اے چوگے دی
چِڑیاں ستّر بہتّر وی ہوسن آل دوالے،
آئے گئے نُوں تاڑ
پُھرل چڑھ کِکری لہندیاں بہندِیاں،
اج وِچ گُھگی وی اے،
اُڈدی نہیں
پہرا پراتے پئی دیندی اے،
پل رَل چِڑیاں نال وی چُنج بھر گِھندی اے،
وت پُوچھ پسار
یُوسف کُھوہ دے بول الیندی
ہو زلیخا ویندی اے:
''کُھوہوں کڈھ اوہنوں بانھا وپاریاں کیتا
نی اڑِیو سُپنا مینڈا،
وِک مِصرے جاں تھیا راج مہاراج
عشق مُشک ہُن اوہدا
نہیں کرنا اپنا میں کھڑبانھا،
مائی دیاں اکھیاں وٹّی اَٹّی سُوتر دی
تِھیوے بانا جگت دیاں کُڑیاں چِڑیاں دا
ایہا نِیت مُراد ہے مینڈی''
چھڈ چوگا ہُن ساریاں اوہدی سُندیاں نیں