فرید بھنڈار

(1)

پہلوں دسو چاء کہ ٹھنڈا؟

 لا الہ الا اللہ

باجی بڑیاں بڑیاں ہستیاں ایتھے رہ گئیاں جے۔

اوہناں نوں پُچھ لئو جا کے

اُنج خاندانی دُھروں طبیعتاں وہمی ہوئیاں

اوّل کسے نوں کیہ پُچھنائے

میتھوں ودھ تے ایہناں گھراں نوں کوئی نہیں نہ جاندا

دائی کولوں ڈِڈھ لُکیا رہندائے؟

تے غسل دین والے دائیاں دے وی پیو ہوئے۔

لا حول ولا قوۃ الا باللہ

میرے سامنے کرو جیہڑا پرچھاواں دَسدائے

ایہ کیہڑی بہار اے وہم دی باجی

اگلے چند تے چڑھ گئے جے۔کوک مگاواں؟

لکھاں پُرانیاں بھُوتاں دی میں پِنجر پُرزے کر کر بولی بولی چھڈی

مال چکا لئو باجی۔

آٹا سونا  ہوندا جاندائے

کیوں بے دید کراوندے او قسمے

کل دا آکھ گئی جے بیگم شیخ ساب دی

ادھے لہور دی مالک جے

پر شِیش محل دے ساگوان دے بُوہے باریاں

شِیشیاں اُتے ساگوان دیاں جالیاں

اِٹاں تے گُلکاریاں

نویاں مُکاناں اندر ٹچ پُرانا

شاہجہانی تڑکائے۔

نویاں کمائیاں دی

اینویں اُچھان نہیں جاندی۔

اوئے بابا کم کر آپنا

توں کیہ سُنن کھلو گیائیں تیسی دھر کے

میں دوائی ویچناں کھنگ تاپ دی؟

ایہہ لیبر جے پرچھاواں۔جیہڑا سانوں چمبڑیا ہویائے

پٹے کھول گیائے ایہناں دے اوہ بھٹو۔

پتھر اکبر شاہی آگرہ

پہلوں شیش محل دی واری ایتھے آیائے

پھیر سن چالیہہ وچ باتشاہی مسیت لئی لے کے آیائےسر سکندر

تدوں ایہہ شہر شریفاں دا سی باجی

جدّی پُشتی رجّے پُجے

اودھو سُدھ نمازی پرہیزی

سبھ کتبے لال لوا کے شوق شہادت کر گئے

پِچھوں جو شورا تے شوہدائے شہر چ آ وڑیائے

نہ کوئی وس حکومت دائے

نہ تہاڈا ساڈائے

بلجیئم دا شیشہ

ہُن لبھو جا کے اوتھے وی نہیں جے بندا۔سیون اپ مگاواں؟

کُجھ تے پی لئو باجی۔بھیڑا لگدائے۔

چار سال میں یورپ رہ کے آیاں

اوتھے مونہہ ای ویکھنے چھڈ گئیاں جے چندریاں

جدی پُشتی لوکاں واستے بندیاں سن ایہہ چیزاں۔آڈر تے۔

پرنس ہویا کوئی لارڈ پرانا ہویا۔

پِتل پا کھلوو سونا  بن جائے۔

میں تے آپ وائف 1 نوں آکھیائے پِیس 2 ویکھ لے گھر لئی۔

پر اوہدا ٹیسٹ 3 نہیں۔

سارا  دن بس  ریہل مُصّلا

مینوں ایہدھروں ویہل نہیں ہوندی

اوہنوں اوہدھروں ویہل نہیں ہوندی

شادمان وچ پلاٹ جیہا اک لے بیٹھی جے

کیہ کرئیے جی سِر تےلُکاونا ہویا۔

اُتوں بچے وڈے ہوندے جاندے نیں

سبھ نوں سَیٹ چاہیدے نیں وکھرے

آپو آپنا سرکل 4 ہویا سبھ دا

اوہ ساڈا کیا زمانہ

ہیٹھاں جندرے اُتے جندرے

نونہاں نناناں اِکو اندرے۔

اوہو جیہی گل کوئی ہوندی میں تے آپ ہتھ نا لاوندا باجی

میرے سامنے کرو جیہڑا آہندائے

اوہدا تے میں پرچھاواں کڈھاں باہمن دا

میں ادھا لہور پُرانا ویچ کے ادھے لہور نوں نواں کرایائے

اِنج پرچھاویں نکلن لگن تے پورا شہر نہ بن جائے میانی،

دفعہ چتالی،چار چار دیاں لیناں اندر۔

توں کن میرے ول رکھی آ کھاں بابا

میں وی اکھ تیرے تے رکھی ہوئی اے

اوس ویلے دا اک ردا نہیں تیتھوں لتھا

مِچ مِچ مِچ مِچ،کم کوڑھیاں والا دیہاڑی ایس ایچ او دی۔

باجی پیسے کل سہی پرسوں سہی

میں منگنے ای نہیں

مال چکاءو آٹا سونا ہوندا جاندائے

قسمے اج زبان اے جیہڑی،بھلکے گاہل جے

ہفتہ پورا ڈکی جے میں بیگم شیخ ساب دی

دنے آ گئی تے اوّل میتھوں نہ نہیں ہونی

ہووے وی تاں میرے نہ نہ کردیاں اوہنے صفایا کر جانائے

کھٹی کھیہہ؟ قران دی قسمے

اسیں تےاینویں تہاڈے مونہہ نوں بیٹھےہوئے آں ایتھے

ساڈی تے ہابی سمجھو

جتھے چنگی چیز ویکھئیے

تہاڈیاں گھراں دی خدمت کرن نوں جی کر پیندائے

اسیں پُرانے لوک جوں ہوئے ہُن،کیہ کرئیے۔

تُسیں پیتا وی کجھ نہیں

بڑی بزتی جے میری۔

(2)       

ہَو ہائے

توبہ کرئیے

پرچھاواں کیہا میں صدقے جاواں

میں شِیش محل وچ باراں ورھے گزارے

پُتر جمے دِھیاں پالیاں

ساڈِیاں نِکیاں نِکیاں گلاں لوکیں لے ٹُردے نیں کملے

مھنداں چاء لیانا۔۔

شُوٹنگ لئی اسیں گئے ساں اوتھے

دِل دے بیٹھا ساب ڈریکٹر میرا

اکھے گھر نہیں ایہہ تا ریخ اے زندہ

اِک زندہ تہذیب دے فن دی عظمت دی تاریخ اے۔

اینویں جیہے کوئی وڑے ہوئے سن

جھٹ پٹ ساب الاٹ کرا کے اوہناں نوں کڈھوایا۔

چھتّاں شیشے کندھاں شیشے

شیشیاں اندر اِک دے ہزاراں شیشے

ہائے، اجے کل دی گل اے، ویکھیں نا

خاب خیال جیہا لگدائے۔

ساب ڈریکٹر میرا آکھے

تیرے اندر دا فنکار جگاون گے شیشے۔

اسیں خوب تماشے کیتے

شیشے اِنج لگنے

جیوں سرکس دے مسخرے

کہانیاں وچ نہیں رانیاں دے جیوں گُنگے نوکر کھُسرے؟

خابگاہواں وچ آلیاں اندر توتے پہریدار بہائے۔

میں اوہناں دے چینگھے لاہونے

سبھ ہس ہس دوہریاں ہونا

پر ہولی ہولی شیشیاں توں میں بور جیہی ہوگئی

ہو نہیں جاندا بندہ؟

میں اِک دن ماں نوں آہنی آں۔ماں

مینوں آپنا مونہہ کوئی ہور ہور جیہا لگدائے،

جیویں پُچھدائے توں کون ایں

کیہ پئی کرنی ایں ایتھے؟

ہائے،ماں میری سمجھاں والی

آہندی اے"بندہ پنج تت کا پُتلا دِھئیے

پہلا تت نی ماپے جیہناں جمی جائی

دوجا تت ای کونت داجِن آن ویاہی

تیجا تت ای دُدھ پُت جِن ویل ودھائی

چوتھا تت ای کسب دا جیہدی کھائی ہنڈائی

پنجواں تت ای رب دا جِن مار جوائی

اکھے دِھیئے او گنہار اسیں ہوئے دُھردے

کیہ پئے کرنے آں جانے کراون ہارا

پاء لاء کے متھے لگیں کسے دے

تینون پتا وی لگے توں کون ایں۔"

پر شیشیاں کولوں مینوں ڈر جیہا آون لگ پیا۔

اوہ توتے کھسماں نوں کھانے

(میں گل پئی کرنی آں

تے انج لگدائے

جیویں سٹلز1پُرانیاں ویہندی ہوواں)

اوہ توتے چور جیویں پنجرے پئے پئے مرن تے آگئے ہوون مینوں ماندیاں توتیاں چِڑیاں کولوں ڈر بڑا آوندائے،سچی۔رکھ وی نا ہُن مھنداں۔رہن دے،

جا  توں سانبھ کھلارا آپنا۔

سنے فریماں سٹور چ بند کروائے

شوٹنگ وچ میرا جی نہ لگے

ساب کھجے۔تینوں سبھ کُجھ بھُل گیائے۔

اوہ خبرے کون سی

میں سَونواں تے آوے

کدیں اوہ مچھر یا گھوڑا ہووے۔

ساری ساری رات کنوتیاں چُک چُک نچے

میں آکھاں

ایہنوں پھنئیر گھوڑی ہو ٹکراں

کدیں اوہ مور بنے

ساری ساری رات اوہدی پَیل تنے

اسمان تاں چھِجدا جاوے

میرا پِنڈا لگے ٹُٹ چلیائے تے کوئی سمندر کھُل چلیائے۔

توں کھاندی کُجھ نہیں سینڈوِچ تے لے نا۔

اوہ خبرے کون سی

میرے ویہندیاں ویہندیاں قہر چڑھے اوہنوں

کپڑے لاہ دئے

چھائیں مائیں ہو جائے

بس دھمک دھمال دی آوے

"جیہناں تھاواں توں ڈرن نمانے اوہ تھاواں نِگھر گئیاں

نِگھر گئیاں پکیاں تھاواں نِگھر گئیاں"

کیک تے لے نہ،ایہہ میں آپ بناونی آں

ویٹ نہیں ودھدا سچی۔

میں آکھاں

میں وی کپڑے لاہواں،

اوہ تکدیاں تکدیاں اک دا ہزاراں ہو جائے

بھنگڑا ماردے آون جیلاں بھن نکلے

دُکھ اٹھرائے1 مونہہ اوہناں دے تِڑکی جاون

سُتے اُٹھدے بالاں دی خشبو نال اکھیاں بھِجن میریاں

میں آکھاں اک رہواں،ہزاراں ہو جاں

ساری ساری رات اوہ اندر نچے

ساری ساری رات میں باہروں تکاں

اُٹھاں دِنے تے پِنڈا ٹُٹے

ساب جے کولوں لنگھ جاوے

جی کچا کچا ہووے کئیں کئیں گھنٹے،

ماں ایتھے پرچھاواں ای کوئی

بس اینی میرے مونہوں نکلی،پھڑی گئی

کسے نوکر چاکر سُن لئی،لوکیں لے ٹرے

شو بزنس وچ ایہو بھَیڑا اے

ماں آہندی اے "ہور لہا اوہ شیشے انھیئے

اینویں لواگئے سن نی اگلے؟

روگ روگ دا دارُو ہوندائی

آہرآہرتے پہرہ ہوندائی

کار ویہار پئے اینویں جگ تے چلدے نی؟

جے اِک شے آپنی تھاں توں ہٹ جائے

پھیر ہنیری چِھڑ پَیندی او

ساریاں شیواں بدھے ٹکانے چھڈکے اوارا ہوندیاں نی

ایہو ای باہرلیاں1 نی پِچھل پَیریاں

گھر نہ وساوے جیہڑی اوہنوں قبر نہیں کجدی"

اوہ فلم فلاپ1 ہوئی

ساب میراکدیں مُلک چھڈن دی آکھے

گولیاں کئیں کئیں پھکے

ست ست دن کدیں گھر نہ آوے

ماں مینوں کیہ ہوندا جاندائے؟

"سُکھ دی گرانی کُڑئیے

ہور کیہ ہونائے،

اسیں جوانی ویچ بڈھیپا کھٹیا

پرائیاں دیگاں سُنگھ ہنگالیاں

توں بھرے بھراتے اندر لُگے چھڈ کے باہر پئی بھونی ایں"

ہائے، ماں نوں ول سی گل کرن دا

اسیں تے اوہدے اگے گُنگیاں

اکھے"کُڑئیے توں ایں گھر تے اوہ گھر والا

اوہنوں رکھ جے رہنا ای

نشکرئیے آہر وی اوہو کار وی اوہو

دِل نوں آہرے لایا کسب کمایا

وہماں وچ اینویں پے کے ہور نہ چن کوئی چاڑھیں"

ماں نے ختم کرائے کالے بکرے کیتے

مجلساں کروائیاں

پانی دم کروا کے کندھاں تے چھٹّے مارے،

شیشے سنے فریماں

اسیں پھیر چڑھا لئے

روز نویں میرے کپڑے آونے

سُوٹ ساڑھیاں چُوڑیدار غرارے

دوجے چوتھے ہیئر ڈریسر دے مینوں ساب نے کھڑنا

رنگ والاں دا کپڑیاں نال مچاونا

میک اپ والا دن وچ دو واری آونا۔

اندر شیشے باہر پبلک میری

دِن رات میں آپنے آپ نوں کم وچ لایا

اوہ خبرے کون سی

پھیر کدی نہیں آیا۔

توں تے چاء وی ٹھنڈی کر لئی اے

گرم بناواں؟

مھنداں کدھر گئی ایں

میں کِنی واریں آکھیائے کُڑی نوں گھلیا کر ہُن

تیرے کولوں نہیں ہوندا

ایہناں لوکاں نوں عادت ہوندی اے کن لاون دی

ذرا جنا میں چیک1 کیتائے نا

مونہہ سُجا کے بہہ گئی ہونی اے۔

وہم نہ کر میں صدقے جاواں

ایس گھر وچ کسے چیز نال جاندیاں نہیں

میں تے آپ نہ اِٹّاں چھڈدی اوہ۔

(3)       

چل ہُن بےوقوف نہ بن

حق تعالٰی معاف کرے

ساڈے فیتھ چ کوئی پرچھاواں نہیں

ایہہ آپنے سِر چوں کڈھ چھڈ۔

میں جد اوس مکان چ داخل ہویاں

چھڈ گئی ہوئی سی اوہ دیٹ بچ1،

ٹُو پلے ہر گیم اوف فلئش ایلسوئیر2،

ایہہ اوسے اُڈائی ہوئی سی پرچھاویں والی

ٹیکس بچاون لئی یا کِس لئی

اینٹر3 ہونا مشکل سی

وِٹھاں،وِٹھاں،

میں پوری بٹالین لا کے سکرب4 کروایا۔

جد تائیں اصلی شکل نہیں نکلی میری تسلی نہیں ہوئی

اینڈ دوز مررز5

اِنچ اِنچ تے،ہیریاں وانگن

تینوں فورٹ6 وچ ایہہ کم ملے گا

شِیش محل اوریجنل7 اوتھے ای اے نا،

زِندہ رہنا مغل نوں آوندا سی۔

ہاں ایہہ آرٹ ہے جیہدی اجازت ہے اسلام دے اندر

ہور تُسیں اوہ بُت شُت کوئی نہیں رکھ سکدے

نہ پینٹنگ شینٹنگ

ایہہ بالکل صاف اے۔

پِچھوں آ کے مغل وی ایسے گند خانے وچ پے گئے

بس طاؤس و رباب آخر، اور کیا۔

وہی ہندو اثر

اکبر اپ سٹارٹ1 سی ذہنی طور تے،باپ کا سایہ سر پہ نہیں تھا،

ہندنیاں دے اگے لگ گیا،جس طرحاں پنجابی چ کہندے نیں۔

دیٹ کرپٹڈ دا ہول بلڈی ریس2

نسل بگڑ گئی

حمیت نام تھا جس کا گئی تیمور کے گھر سے

اورنگزیب نے کوشش کیتی گیم نوں آپنے ہتھ وچ لین دی

احمد شاہ ابدالی نے وی کیتی

پر سلطنت ہاتھ سے جاتی رہی

پھِر دِیں بھی گیا دُنیا بھی گئی

ٹیپو واز آرلاسٹ مین3، ہمارا آخری آدمی

ترکشِ مارا خدنگِ آخر یں4

پر شیئن تمہیں نہیں نہ آتی

سارا ایجوکیشن سسٹم بیٹھ گیا ہے۔

دا لاسٹ شیفٹ اِن آور کو یور،سیز اقبال

اُس بیچارے کو غداروں نے نہ چھوڑا

جعفر از بنگال و صادق از دکن

ہمیں ہمیشہ آستین کے سانپوں نےمروایا

اب بھی یہی ہے،اندر یہ ہیں

باہر یہود و ہنود کی سازش۔

نہیں نہیں توں بسم اللہ کرتے لے لے اِٹّاں شِٹّاں لکڑی شکڑی

ایہہ رِئیل سٹف1 اے۔میں تینوں دساں۔

نہیں لینا تے مینوں دےدے۔

ہاں بئی نیوز اے تیرے لئی

شہلا اجکل نویں مکان دا سوچ رہی اے

اوہدی وی ہابی اے کنسٹرکشن تیرے ونگر

خاص طور تے شیشے۔

ہاہ۔ہائو آئی سٹرگلڈ2 اِک اِک اتے میں کتنی کوشش کیتی،

ڈیٹیل3 واستے میں ہمیشہ سخت رہیاں کجھ زیادہ ای۔

ایہہ مارشل لاء دی گل اے

پُرانے دی، دا رئیل ون4

اصلی تے وڈا جیہنوں پنجابی چ کہندے نیں،

جد میں شہر نوں لُک آفٹر5 پیا کردا ساں

میں فیصلہ کیتا کہ ہیڈ کوارٹرز شیش محل وچ رکھیا جاوے

سنٹرلی لوکیٹڈ6 سی

آئی ٹاکڈ ٹو دی اولڈ مَین ہی سَیڈ گو اہیڈ7

میری ہمیشہ اکھ سی اوس جگہ تے،

مُسلم پراپرٹی ہندو قبضہ

ایہو وجہ سی سَیپریٹ ہوم لینڈ1 دی۔ الگ وطن کی،

اپنا جو کجھ ہے وہ غیروں سے واپس لینا۔

خیر اصلی وجہ آئیڈیالوجی سی،نظریہ،

پھر دوبارہ اپنا آپ پہچاننا۔

وہ کیا گردُوں تھا جِس کا تُو ہے اک ٹوٹا ہوا تارا

پر چھاویں والی گل مینوں پتہ سی اوس اڈائی ہوئی اے

دَیٹ سیزنڈ بچِ2

ایہہ جتنیاں نیں نا ہمیشہ وہمی ہون گیاں

میرا اکثر واہ پَیندا سی

شہر نوں جد میں لُک آفٹر پیا کردا ساں

پُٹھیاں پُٹھیاں میرے کول رِکویسٹس3 لیاوندیاں ہوندیاں سن

کبھی کوئی انکم ٹیکس کا فلیپ4 کبھی کُچھ۔

مَیڈ بِچز5

یہ انکی گِلٹ فِیلنگ جو ہے نا اِنکو وہمی بنا دیتی ہے

احساسِ گناہ کہتے ہیں جِسکو۔

میں نے پَیک کرا دینا سی واہگیوں پار،

اسلام دے ناں تے ملک بنا کے

ایہہ سبھ نہین تُسیں کر سکدے۔ایہہ صاف  اے

ایہو تے کرس6 اے ساڈے اُتے۔عذاب کہا گیا ہے جس کو۔

سب نام کے مسلمان ہیں۔

تھے تو آباء وہ تمہارے ہی مگر تم کیا ہو؟

عرب! گھٹ کہیا جائے جتنا اچھائے۔

قروُن اُولٰی کی تو بات اور تھی

اوہ سی وقت جد صحرا چوں اُٹھ کے

اسیں ساری دنیا نوں سبق سکھا دتا سی

خالد جیہے تہاڈے کول سپاہی سن،

پر عمر جیہا پچھے لیڈر وی سی،رضی اللہ عنہ،

بندوق کے پیچھے آدمی اصلی چیز ہے

اور آدمی کے پیچھے لیڈر اصلی چیز ہے

پھر آتی ہے یونٹی فیتھ ڈسپلن

چائینیز کیا تھے بلڈی افیمیز

اَیوری تھرڈ پرسن ہیڈ وی ڈی1

اک لیڈر اُٹھیا صاف کر گیا سبھ نوں

ساڈے آدمی فسٹ کلاس میٹریل نیں،

ایہہ بالکل صاف ہونا چاہیدائے ہر اک نوں،

بھئی سیدھے سادے مسلمان ہیں

مگر قیادت کا فُقدان ہے

قحط الرجال جسے کہتے ہیں وہ ہے،

لیڈر کہاں سے آئے،

تالاب ہی گندہ کردیا ہے۔

بس اِکو رستہ اے

دو چار ہزارتُسیں کالیاں بھیڈاں مار دیو

میں دو چار لکھ وی مائنڈ نہیں کردا

جیہڑے رہ جان نتھ پاء کے رکھو،جیہنوں پنجابی چ کہندے نیں۔

سبھ بلڈی کمیونسٹ،بدماش ٹریٹر 1صاف کر دیو

خاص طور تے کمیونسٹ، بنیادیں کھوکھلی کرنے والے

لیبر لے لوٹیننٹس2 لے لئو

دماغ خراب کر چھڈے نیں ایہناں سدھے سادے لوکاں دے

کلاس کلاس کلاس

ہور کوئی گل نہیں آوندی

بھئی جب اک مِلت کے فرد ہو سارے،ایک اُمّہ

پھر طبقات کہاں سے آگئے؟

کلاس کلاس کلاس،یور بلڈی آس،اکسیکوزمی۔

میں تے سبھ توں پہلے فیصلہ کیتا سی

آپنی فارم تے ٹیننٹس نہین ہُن چل سکدے

میں باڈر تے بیٹھا ہویاں

ایہہ روز دی بک بک اوتھے نہیں سی چل سکدی

بس اک جواب اے ماڈرن میکنائزڈ فارم3،

امے ریکہ وچ دو چار سو فارم نے سارے

پوری دُنیا نوں رزق پئے دیندے نیں

گرینری آف دا ایسٹ4 سی ایہہ علاقہ

ہُن بن سکدائے،وِد پراپر پلینگ1

گرینری آف مڈل ایسٹ تے بن ای سکدائے

اینڈ ویٹس مور پے انگ2۔

ایٹ و کلاک آلریڈی3

میں ہمیشہ جیہنوں پنجابی چ آہندے نیں پَٹریوں لہہ جاناں

یہ مضمون ہی ایسا ہے جذباتی۔

نہیں نہیں توں بسم اللہ کر

ایہہ ٹھیک جگہ اے پیسہ لاون دی،اینی ٹائم،

پر چھاواں شر چھاواں اینویں وہم پُرانیاں بُڈھیاں والا

توں تےوِمنز لِب4 نوں رپریذنٹ کرنی ایں

نئے دور کی پیداوار ہو۔

میں ایہناں دم درُودز وچ کوئی یقین نہیں رکھدا

ایہہ اسلام نہیں

ساڈے لوک ایہناں نال کم شم ٹور لیندے نیں بعضے ویلے،کوئی ہرج نہیں۔

سائیکولوجیکل پراپ5 اے۔فاردا ٹائم بینگ6

اک واری سسٹم نافذ ہو گیا

سبھ سدھر جائیں گے

سسٹم اصل چیز ہے

اصل نظام مکمل اورجنل7

کوئی سمجھوتہ نہیں

سود شود سبھ صاف

چوری کرو تے ہتھ صاف

ڈَرٹی لُک ٹو ورڈز آ ومن یو آر سٹونڈ ٹو ڈیتھ

میلی نظر سے دیکھا اور سنگسار

ہور کوئی ہینکی پینکی،کوڑے بائی دا ڈزن1

اور زکوٰۃ ہر صاحب نصاب سے ناک کے رستے

میں کہتا ہوں ایک سال کے اندر اقتصادی اور معاشی طور پر

ہم خود کفیل ہو جائیں گے

پھر قرضے کی لعنت جائیگی، انوسٹمنٹ2 بھاگی آئیگی

ہمارے عرب بھائیوں کے پاس جو سونا ہے وہ کس لئے ہے آخر

ہماری مین پاور اُن کا آئیل3،

اسلامک بلاک،سپر پاور،سپریم پاور،مکمل غلبہ

جسے کہتے ہیں۔

اور ہم لیڈ کریں گے،برین ہمارے پاس ہے

چودہ سو سال پہلے جو کچھ ہوا وہ اب بھی ہوگا

وہ شیر پھر ہوشیار ہو گا

اسیں اوہو میٹریل نہیں؟

خیر پھر سہی

یہ مضمون تو ہر دم تازہ ہے۔

نہیں نہیں توں بس لین دی کر اوہ

فسٹ کلاس بارگین1 جے مینون پُچھیں۔

سبھ پرچھاویں صاف، ٹھیک ہے؟

آرکی ٹیکٹ پراپر1 ہووے، آپ توں اوہنون دس جو چاہونی ایں،

پُرانیاں اِٹاں چیزاں واستے سپیس3بناوے

موقع کڈھے،

ایہہ چیزاں پراپر جگہ تے لگ جاون تے رونق بن جاندی اے،

پرانے وقتوں والی آبرو جسے کہتے ہیں،

دے میک می سِک،دِیز اپ سٹارٹس4،نودولتیئے

شہر دا لینڈ سکیپ5 تباہ کر دتائے

مکاناں ول تُسیں ویکھو

سُوہا بزار بنا چھڈیائے

ایہنان دیان عورتاں ویکھو آل ڈیکڈاپ6

سِک بِچز

یہ اصراف ہے۔اسکی کوئی گنجائش نہیں ہے۔

بس پُرانی دنیا دیاں کجھ چیزاں

ٹھیک جگہ تے،کافی اے۔

اوہ بھُل جا سبھ پرچھاویاں بارے ایہہ سبھ اوسے دا پھیلایا ہویائے۔

لوکاں مینوں دسیا ہویا سی

میں فیصلہ کر لیا وہم صاف ہو گیا۔

 میرے آدمیاں تے پے گیا سی پرچھاواں

ایک آیا

ساب سِر دی پیڑ نہیں جاندی ایتھے جدوں دے آئے آں

ایک آیا

ساب نیندر رات نہیں آوندی ایتھے جدوں دے آئے آں

میں آکھیا نماز پڑھو اوئے

پانچ ٹائم میں چیک کروں گا آکے

بس سر دی پیڑوی صاف تے نیندر فسٹ کلاس

ہمارا سب سے ایفکٹو ویپن1 ہے

جسمانی اور روحانی صحت کا راز

صفائی ورزش کونسنٹریشن2

یہ ہندو کا یوگا شوگا کچھ نہیں اس کے آگے

یہ بنیاد ہے اس کے بعد توفیق ہے اپنی اپنی

چاہو تے فرشتے بن جاؤ

مگر۔فرشتہ سے بہتر ہے انسان بننا۔

سب مرضوں کی ایک دوا

پے نے شیا3 میں تمہیں بتا دوں

میں کدی نہیں چھڈی،حق تعالٰی معاف کرے

پِچھلی وار جد عمرے واستے گئے ساں میں تے شہلا

بھُلیاں چُکیاں وی پُوریاں کر آئے ساں

ایہہ بڑی فیسلیٹی4 اے،

بڑی رعائت کیتی گئی اے

اسکو کہتے ہیں دینِ فطرت

انسان توں ناقص ہے بنیادی طور پر

قدم قدم پر اسے سہولت دی گئی ہے

ظُہر یا مغرب بعضے ویلے رہ جاندی اے کم وِچ

باری تعالیٰ معاف کرے

فجر میں مِس نہیں کردا

مائی گاؤٹ1 ایہہ ہن تنگ کردی اے مینوں

پر پھیر وی بہہ کے پڑھ لیناں

تہانوں ڈسٹل2 کر دیندی اے،تطہیر جسے کہتے ہیں

ایک یقین اور اطمینان سے بھر دیتی ہے

پھیر جماعت نال تے کیفیت ای ہور اے،

جد میں شہر نوں لُک آفٹر پیا کر دا ساں

شاہی مسجد میں عید پڑھی

عید آزاداں شکوہ ملک و دیں

میں تینوں دسناں آئی لکڈ اے ڈفرنٹ ہیومن بینگ3

آئی ہیڈ آٹر منڈس فیلنگ فور دا پیپل4

کیا جذبہ تھا۔جیسے دل روشن ہو۔

اوس ویلے میں لوکاں کولوں جو چاہوندا کرواسکدا ساں

ہم پرائز نیچے لے آئے تھے

تین مہینے انکو ایک لیول پر رکھا

پھیر کُجھ لوک جیلس 5 ہو گئے

خاص قسم دی لاگت بازی جیہنوں پنجابی چ کہندے نیں،

اِک واری اِک جگہ بندہ

گھر اَوڈر وچ کر لئے،

کوئی فیورٹ پُتر یا بیوی دا پَئٹ1 کریڈٹ لین لئی آ جائے گا

ساڈی سکستھ سَینس2 سانوں دس دیندی اے

شہلا دا وی ایہو خیال سی

کیوں گردن باہر کڈھنائیں

ٹیک اٹ ایزی3

میں گردن باہر کڈھنی بند کردتی، پرائسنرپہلے نالوں وی تن گنا اتے ہو گئیاں

میں آپنا ٹرمپٹ بلو 4کرن توں نفرت کرناں

پر اک چیز جیہڑی میرے وچ نہیں

اوہ جیلیسی5 اے

اَیز اے مسلم تُسیں افورڈ نہیں کر سکدے

تُسیں ایز اے مسلم فنکشن6 ای نہیں کر سکدے۔ایہہ صاف اے۔

جے معدے اندر جیلیسی دے جرمز ہون

ایہدا علاج جلاب ای ہوندائے

سپِر چول پرگیٹو 7،تزکیئہ نفس جسے کہتے ہیں

جے تہانوں خیال رہوے

اوہدی ذات سبھ طرفوں دیکھ رہی اے تہانوں

تد تُسیں آپنی جگہ تے رہندے او

ورنہ یہ انا1 جسے کہتے ہیں سب سے بڑی بلا ہے

سویلز2 لائیک اے بلڈی پیرا شوٹ۔

ایہو یُوز3 میں کیتا سی اوہناں شیشیاں دا

جد میں شہر نوں لک آفٹر پیا کرداساں۔

شیشے شیشے

چھتاں فرشاں اُتے،کندھاں اُتے

اون ایوری بلڈی انچ

ٹائلٹس وچ وی۔

میں وچ میز تے بیٹھیاں ہونا یونیفارم اینڈ آل

بڑی عجیب سنسے شن ہونی

صوفیاء نوں ہوندا ہونائے ایس طرحاں دا تجربہ واللہ اعلم

کوئی طاقت مینوں ویکھ رہی اے

میں ای ہاں اوہ طاقت

اک اشارہ میرا،کئیں کروڑ جواب

میں اندر گٹس 4 دے وچ محسوس کیتا

آل مائٹی او منی پریذنٹ او منی پوٹنٹ5

مینوں ایہہ سبھ تینوں دسنا تے نہیں چاہیدا

ایہہ ہر کسے دے کناں لئی نہیں ہوندیاں گلاں

ذات باری معاف کرے اینوین پاس اون6 متے کر دی پھریں

پر توں اوہ چیزاں شیزاں لے ای رہی ایں اوتھوں

ایس واستے دسنا ہے وی ضروری۔

واٹ آ فیلنگ۔واٹ آفیلنگ1۔

میں ای میں ساں چارے پاسے

اَون ٹوپ2،اِن ٹوٹل کنٹرول3

ایہہ فیلنگ عمر چ اک ادھ واری مِلدی اے

جد تہانوں لگدائے سبھ کجھ تُسیں او

جو تسیں نہیں اوہ ہے ای نہیں

جو چاہو تسیں کر سکدے او

نہ چاہو علیحدہ گل اے

پھیر اکدم بیٹھیاں بیٹھیاں کُجھ ہو گیا،

مینوں پنیاں وچ کوئی ٹھنڈ جیہی لگن لگ پئی،

شیشیاں وچ ایہہ میں تے نہیں،خدا اے؟

نہیں بلا اے کوئی۔میں نہیں

میں نہیں

سم مانسٹر4  مینوں تاڑ رہیا اے،

ٹھنڈ موڈھیاں وچ وی چڑھ گئی،فرش ڈیمپ سی،ہے نا

ٹیریبل5 میں ایہہ سٹینڈ6 نہیں کر سکدا،

اکھاں،اکھاں،مگر مچھاں دے مونہہ داڑھیاں

غاراں تِلکنیاں

مینوں سُرک کے پچھے سٹن آ گئیاں نیں

اوجھریاں وچ،بیہی دال،لے لتھے،سِلھے اندر،

میری گن میری گن

رائٹ لیفٹ سنٹر،اکھاں

میں اک پھُنڈناں ایہہ کروڑاں چڑھدیاں آوندیاں نیں

اپر تھلے سینٹر کتھے

سینٹر مونسٹر

مونسٹر

بچا لئو

غا آر غا آآغاآآآرررر

میرا آڈرلی ہفیا ہویا میرے ساہمنے کھلوتائے

ایہنوں ساری گل دا پتہ لگ گیائے دَلّے نوں

میری گن میری گن

پھڑ باسٹرڈ جلدی کر

کنبی جاندائے سِر توں پیراں تیکر

دونہاں ہتھاں وچ دلّے

میری گن میری گن

تیرے مونہہ وچ

اکھاں کناں وچ

تیریاں ستّاں موریاں وچ

تیریاں ستّاں پُشتاں وچ

میری گن میری گن

ہلی جاندائے سارا

گن۔۔۔۔۔گن

اوہنے مینوں ہُنے ڈلیور کیتائے،

ٹھنڈ کوئی نہیں،اٹس کوزی1۔

ہی آسکڈ فور اٹ2،جُراباں گلیاں سن۔

شیشے صاف نیں

آئی ایم بیک اگین3

ہیل!توں ایہہ سبھ کیوں سُن رہی ایں؟

وائی دا ہیل بلڈی کونسپریسی4

سب سازش ہے مجھے علم ہے،

ابھی جانا ہوگا تم کو،

جانی ایں کہ نہیں؟

نہیں،گل سُن،گل سُن،

توں اک لفظ نہیں کسے نوں دسنا،سنتی ہو

جو کہو گی کر دیا جائے گا

ہم شیش محل پھر پورا نیا بنا دیں گے۔

آئی ایم سوری،کیا کہتی ہو،آ پراؤڈ5 یادگار۔

بہہ وی جاہُن

تیرا آپنا ای فائدہ اے جے توں ایہہ سبھ بھُل جائیں

میرا کیہ اے

مینوں گھٹ پرواہ نہیں ہوسکدی۔

کوفی ہو جائے کٹھے چلنے آں چیزاں ویکھن

توں ہو سکدائے

کوئی اکدو آئٹمز میرے لئی وی چُن سکیں

تے میں شہلا نوں سرپرائز دے سکاں۔

اینویں جوک سی گپ شپ سیر یسلی1 نہ لے لیئں

کدے کدے میں ایکٹ وی پُٹ اون2 کرناں

ایہو جیہیاں کہانیاں

رف اولڈ سولجرز3

ڈیلی کیٹ ینگ لیڈیز4 نوں

سُناونا آپنا فرض سمجھدے نیں۔ہاہاہا۔

میں تینوں جیہڑا پنجابی چ کہندے نیں

پیروں کڈھ چھڈیائے کہ نہیں؟

ہاہاہا۔

(4)       

بی بی ہے پرچھاواں

ہے کیوں نہیں

پر شیش محل دا جم پل نہیں

پرچھاواں تے جیہڑا آیائے آپنا نال لیائے

جیہنوں چُلیاں دُدھ پیاوندے او

اوہ ایتھے پج کے کُچھڑوں لہندائے

ڈرجاندےاو،

بی بی تُسیں جداداں والے جے

جدوں اُلاد سیانی ہو کے ونڈیاں پاون کھلووے

اوہدی اکھ پچھانی جاندی اے؟

دادے میرے ای اٹّاں ایہدیاں بندے ویلے ڈھوئیاں نیں

جیہڑیاں اساں ہُد یڑیاں نیں

تدوں نویں نویں ریل پنجابے آئی آہی

بھُکھ پئی اے آخر دی

تے خلقت گھراں نوں چھڈ مجوریاں پچھے نسی اے

ایہہ شیش محل کے ساڈے ای پنڈ دے آہے

ایہناں دی واہوندے آہے وڈکے  ساڈے

بانگاں شہر دیاں

جد ساڈے پنڈ سُنیجن لگیاں

ایہناں دے قبلے پھر گئے

بھوئیں دی ایہناں چاندی وٹ لئی،

مُنڈے کُڑیاںپڑھ لکھ کے انگریج دی مرجی سمجھن لگ پئے

اُتوں لاماں لگ گئیاں

چاندی سونا ہو گئی،

لندنوں ناں ایہناں دا بولن لگا،

جد خلقت جُڑ سڑکاں تے آگئی

لَیناں پٹیاں گئیاں

انگریج نے کونسل جوڑی

جھٹ پٹ گنڈھ بلادریاں ایہہ ممبر موہری ہوگئے

محل کھلو گیائے جس ویلے

تے وڈا ایہناں دا دادے میرے نوں اک دن ہس کے آہندائے

کہ خیال اے بھائیا تیرا

ول کجھ بن گیائے کوٹھا

دادا میرا کیہی تگاری دھر کے بیٹھا ای آہیا

حقہ سدھا کرکے بولیا

سانوں سار کیہ ایہدی چنگے ماڑے دی

جدوں پٹاونا ہووی سد لئیں

اوہ دن لاء اوہنے دادے میرے نال اکھ نہیں میلی

اِٹ اِٹ تے شیشے ٹھوکن لگا

پوٹا پوٹا شیشیاں بدھا

لوہے بند سپاہی جیکوں گُذریاں باتشاہیاں دے،

کئیں واری گہنے پیائے کرائے چڑھائے وِکیائے

جیہڑا وی ایتھے وڑیائے

شیشیاں کولوں گواہی دیواوندا ہریائے

شِیش محل نہیں شیش کچہری آکھو بی بی

ایتھے کوئی وکیل دلیل نہین ہوندی

بھگتدا بھگتاوندائے سبھ کجھ آپے جج پر چھاواں

ہور کیہ ہوندیاں نیں پکیاں تھاواں