سَوڑی گلی وِچ ذرا موکلی تھاں اے
چونک تے نہیں پر لگدائے خبرے ہووے
آل دوال دُکاناں
پھل سبزی تے فوٹو کاپی
فون مرمت دیسی مُرغی
وِچ الخدمت ریستوراں
“کوالٹی چکن کڑاہی
برین مسالہ
دال معاش اور سبزی مِکھسِٹ”
تنگ جیہا راہ اندر جاندائے
اِک اِک ہو کے لنگھنا پوندائے
سیکورٹی چیک وی آپے ای کندھ کریندی اے سمجھو
باہر بوہے دے نال اِک پاسے
لیکچر یا تقریر کرن والا ڈبا چبُوتر
مِمبر ولَیتی آکھ لؤ ایہنوں
جتھے مقرر کاغذ دھریندائے اوتھے برگر تیار دھرے نیں
پِچھے چونکی اُتے کھلوتا بچہ
وِچ وِچ نیندر پوری کریندا
ویچن تے ہے
مِمبر اُتے “الخدمت” دے ہیٹھوں
بجُھیا بجُھیا “الحبیب” وی پڑھیا جاندائے
ریستوراں دا ناں پُرانا
یا “الجیب” اے خبرے
دُوجے پاسے اِک جوان کھلوتا توے تے روٹی لاندائے
جُھکدائے پیڑا چُکدائے خُشکا مَلدا ہتھ نوں پانی چُھہاندا
دو ہتھ پیڑے اُتے تھاپ کے
پُٹھی تلی تے چاڑھ بھواندا سِدھا ہوندائے،
پُھلکا ہوئے پیڑے نوں ٹِنڈ توے تے مَڑھ سَرکاندا، لاہ چنگیر وگاندا
جُھکدائے پیڑا چُکدائے
موڈھے گوڈے عجب تال وِچ پیا جُھلاندائے
جیویں پیٹ دے اندر بال ہے کوئی ناچ جمن دا نچدا
یا روم روم چوں جاری ہون تے آیائے ذِکر حق سچ دا
ستّر ورھے ہوئے نیں
رکّھو ماچھن تاء تندوری
ایویں حال کھیڈیندی روٹی لاندی آہی ساڈے شہر پُرانے
ایہہ اوہدی آل اولاد نہ ہووے خبرے
نال سٹُول تے بیٹھا پٹکے والا بُڈھڑا
ہَولی دِتی مینوں پچُھدائے اکھ مار کے
“لان والے دا نچیا روٹی وِچ وی پَیندائے؟
جے پَیندائے تے کھان والے دے اندر وی کِتے لہندائے؟”
میں ہس ٹُریاں
ایہہ ہُن تُسیں سیانے او دسّو
اساں تے ویکھی گِنن گوچری کرن جوگے مساں ہوئے
ایہہ ستّر ورھے چڑھا کے