اوہ شکرقندی پیا کھاوے بنچ پہاڑی تے
پتلا کالا کُڑتی دھوتی ٹوپی اُن دی
پیر گَھسی گُرگابی
اگے رنبی
میں لنگھدا کھلو گیاں
"بہہ جاؤ اُٹھ جاناں میں
کھان بہہ گیاں
پَچدا جو نہیں کَھڑ کھادا، مَیں دا وٹ پِھردائے"
"بیٹھو تُسیں، میں تے پِھرن تُرن ای آیاں
ایتھے ای کم کردے او؟"
"ایسے پہاڑی تے"
"کدوکے؟''
"تریہہ ورھے ہوئے جے
تدوں ایانِیاں آہیاں ایہہ چِیلاں
پنجاہ دیہاڑی آہی
سَو ہوئی پھیر دو سو"
"محنت تہاڈی"
"دین ہار اوہ دین دار وی"
"جدّی کم جے؟"
"دادا فوج وِچ آہا"
"سپاہی؟"
"نہیں سوت صفائی
پِنڈ سی باڈر جِتھے کھلوتائے
امب لگدے سن
تدوں مسالہ کوئی نہ ہا پاوندا
دادے فوج دے کموں آونا
امباں دے کم لگ جانا
نال سانوں وی لاونا
جو سِکھیا سو ایتھے لیایا
تریہہ ورھے ایتھے گذر گئے نیں
جو سِکھیا اوسے پکیاں کرایا
ہُن رٹائر ہونائے
پچُھدے نیں اگوں کیہ کرنائی
آہناں جیویں کراوے"
"والد تہاڈے؟"
"نہر تے بیلدار اوہ ہو گیا ہا
اسیں لازم ملازم لوک آں سوت صفائی تے مُڈھوں"
"رُکھ تُساں ای لائے ایہہ سارے؟"
"ویکھو
ہا پہاڑوں آیا، اوہ تھلاں توں آئی
ایویں ٹبر بن گیا وِچ پردیس دے"
"محنت تہاڈی"
"لگن تے آون لگ جاندے نیں جیہڑا لائے
میں ہوواں کوئی ہووے
ہتھ جُوں اوہدے ہوئے"
"بال تہاڈے؟"
"اِکو دِھی اے دسویں پئی کردی جے
باراں کر جائے سولاں کر جائے
جِتھے پڑھی اے اوتھے پڑھاوے
سوت صفائی نہ چھڈے
سوچیں پے جاناں جدوں آہندی اے
'سَت پِیڑھیاں سوت صفائی
کمائی تیرے وڈیاں دی
کِتھے گئی
کُوڑا سَو گُنا نہیں ہو گیا؟
آہناں سوت صفائی دل دی دوائی او
اکھے آپ ای کھاندا آیائیں اوہ پُشتو پُشتی
گند پاون والے تے ہور دوائیاں کھاندے نی نویاں سو نویاں
کھا کمائی تیری پچاون کارن-'
سوچیں پے جاناں،
تُسیں وی سوچیں پیندے لگدے او
جاؤ سیر کرو، اوہ خیر کرے
میں شکرقندی مُکاواں جیہڑی رہ گئی اے"