وے شیخا
ہُن گھڑی کیہڑی پیا ویکھنا ایں
ڈھیر ہوئی ہنڈائی توں بُھن کھوائی
جیہڑی کھیڈنی اے اوہ تے وار سُنا،
پیا دسنا ایں جیہڑی راس والی
راساں ایہدیاں ہتھ تے کِسے دے نہیں
ہر دے جِبھ جباڑے کڑیالڑا ای
اَڑے کوئی تے چھک ایہہ مُونہہ پاڑے،
ہے ای دھک دھرو لاہا کھٹنے لئی،
سرجنہاراں دی کرت نوں وست کر کے
ویچ وٹنے لئی
تگڑے ہون تگڑے پِھٹ چَوڑ چِھجن
کپّر پُھنڈ وراگ دا پیا جُھلے
ماڑے سُنگڑی آون نِت سَوڑ سِجھن
رنگ رنگ مشہوری اُتے آؤ دُھوڑی:
''ویکھو کُٹن چُوڑی پہن سوئن چُوڑی''
دھرت گل بُسے
انبر پاٹ کُھلے،
راس والی توں آہنائیں؟
راس کرن ایہنوں کوئی کار نہیوں
کِت بِدھ وی سودھ سُدھار نہیوں
گُنجھل خور جنجال نِت پسرواں ای
مُڈھوں پٹیوں باجھ اُدھار نہیوں،
جِتاں گِندیاں اساں کیہڑا رج جانائے
ہے بس اینی ہی بُھکھ
نِت جِتدے جیہڑی دن رات آئے
اج اوہ ہار سُنا