اوہا پھیرکرن
(ناظم حکمت جیلوں)
ول اسّو سویر
ول داکھ بگیچڑے اسّو سویر
ولاّں پال تے پال گُھنڈی دار ولاّں
گُچھے مُڑ گُچھے
وچ گُچھیاں دے دانے وت دانے
چھوہے دانیاں نوں لوء چھوہے چھوہے
ول دَھول محل، وت بارِیاں بارِیاں وت جگ مگ
مُڑ دھرت تے رُکھاں سمندراں تے، کنیاں ورھن پئیاں
مینڈیاں ہتھاں تے مُونہہ تے اکھیاں تے،
مُڑ مُڑ گھا اُتے کنیاں وَسّیاں مِدھیاں جان پئیاں
وت دینہہ مینڈے اِکو جیہے نیں جو
وت دینہہ مینڈے اِکو جیہے نہیں جو
دھاگہ پِھرے تانے دھاگہ پِھرے پیٹے
وت رات،
اسمان تے مُڑ تارے
سبھے بولیاں وچ بولے بول اوہا
“ تینڈڑے نال ہے پیار مینوں”
وت رُکھ دا جھاکنا ڈُس وِچوں
سَلّ جیونے دا نِت نِت اوہا
جیہڑا جھٹ اِکو اوہا لَیندا اے مُڑ ہر مَوت مَنجے
برف برف
مُڑ ہولی مُڑ ترکھی مُڑ برف برف
کپّر بن مینوں سڑکوں نِت لاہے
وت بال بلُونگڑے نچدے نیں ویڑھے وچ پئے
ویڑھے وچ پئے وت بال بلُونگڑے نچدے نیں
بُڈھڑی کوئی پئی سڑک توں لنگھدی اے
پئی سڑک توں لنگھدی اے بُڈھڑی کوئی
(اُنج آکھ لئو اِنج آکھ لئو)
راتیں دَھو ل محل
وت بارِیاں بارِیاں نِت جگ مگ
سچ لئی اُٹھن خیر کان نِکلن
لڑن خلق دے حق لئی سچ لئی
خیر حق نوں سچ نوں جا پُجن
ہنج چُپ تینڈی
مسکار تینڈی سسکار تینڈی
تینڈا کھِڑ ہسن
وت کھِلدیاں دنداں دی لِشک اوہا
ول اسّو سویر
ول داکھ وَلّاں نال گھُنڈیاں مُڑ
گُچھے مُڑ گُچھے وت دانیاں نال پئی کھیڈدی لوء
لوئے دل مینڈا
مینڈی جان کرشمہ ای پھیر ہوون
اوہا پھیر کرن
پھیر کردیاں اوہا نہ پھیر کرن