اسیں ببر شیر سرکاری
ہاں جی
ببر شیر سرکاری
ساڈا ذکر رپوٹاں اندر
(نوٹ پرانیاں فائلاں اندر)
اگ دی جھالر ساڈے کالر
تاج دی ادھی ہیبت ساڈی
بعضے آکھن ساری
اسیں ببر شیر سرکاری
شیراں والے دروازیوں باہر ڈیوٹی ساڈی
(ساڈے ناں تے کجھ دروازے
شیراں والے اکھواؤندے نیں)
جیہڑا جاوے اوہو آوے
جیہڑا آوے اوہو جاوے
آوندا جاندا لگے ڈردا
(شکل ضرور اجیہی بناوے)
اٹھ وج کے ست منٹ تے اج جو شہر دے اندر ہویا
(ہویا تے کجھ نہیں)
اٹھ وج کے ست منٹ تے
اوہو اگلے سال وی ہووے
(ٹِیپ دا مصرع پچھے رہ گیائے
اوہ نہ ہوئے اعتراض ای ہو جائے
ایہدا گھر تے پورا کر لَو
کرنے آں گل ساری)
ہاں جی ببر شیر سرکاری
رَجیاں دے اسیں رج دے راکھے
بُھکھیاں دی اسیں بُھکھ دے راکھے
لَکھی لَکھوں لَکھ بناوے
کَکھی کَکھوں کَکھ بناوے (امن امان وچ خلل نہ آوے)
اساں تاں فرض نبھاونائے آپنا
رزق حلال دا کھانائے
لِسّا دِسے تاں آکڑ جائیے
ڈاڈھا دِسے تاں نِسل ہوئیے
باقی ویلا پہلی دی یاں دوجی گل دی تیاری
ہاں جی
ببر شیر سرکاری
جنگل وچ ہُن مڑ کے جانا
نری موت جے
گدڑ گالہڑ مان نہیں اجکل
رُول شکار دے اُنج سخت نیں
بال بچڑ داری
اوہ ہو!
بال بچڑ داری
اسیں ببر شیر
ہاں جی
سرکاری
پوچھل ہلدی رکھیدی اے
(اُتلے دا اتبار نہیں ہوندا)
سمجھو اکثر ہوئے جناور
ورھے چھماہیں گُھس جاندی اے
بُھبھ مارن دی واری
جی ببر شیر
سرکاری