آپاں تلنے آں کُوڑ پکوڑے
کڑاہی سرکاری
ویسن تیل وپاری
بس کاراگری اے مرچ مسالہ
کتھوں لیاونائے
کیہ کیہ کِنّا پاونائے
ساڈے تاں ہوئے اُستادی نُسخے
سمجھ نہیں ہر کوئی سکدا
کم جو ہویا پُشتینی
جوان تے کھاندے ای نیں، کماں کاراں تے جاندے
پکیری عمر والے وی
خاص کر افسر دفتر وِچ مگواندے نیں
گھراں والے، سبھ جنے جنانیاں
بال بچڑ دی ہوئی جو ذِمے واری
چسکا تے بُڈھیاں نوں ہوندائے ودھیرے
لگدی واہ اوہ وی گھٹ نہیں کردے
ہاضمہ ساتھ نہیں دیندا
بالاں نوں تے لگنے ای ہوئے نا کَوڑے
دوروں ای مُونہہ بناندے نیں
ویلا پا کے بُل جِبھ گِجھ بِھج جاندے نیں