پارک پہاڑی چڑھدیاں ڈِٹھم
اُڑ پئی گھاہ چوں وِین کوئی بُوٹی کھوہ پئی تھیلے پاوے
بھاری کالی
عمر پکیری،
“ایہہ ساگ اے مائی؟”
“خورے کیا ہے”
“کِس کم آوندائے”
“جوڑوں پٹھیوں کا درد مُکاتا”
سمجھ گیئم مینوں کھاندا پیندا جان کے اُردو لاوندی اے پئی
“رگڑ کے لائِیدائے بھین میرئیے؟” بہہ کول میں پُچھناں
“نانہہ پکا کے کھائیدائے
سلائی پیندی او وچ
اوہ وی ایتھے ای لبھنی اے اُتوں یا تھلیوں
اوہدا پَتر چوریڑائے”
“کیویں پکانائے”
“رلا کے دونہاں نوں
پورا مَرچ مسالہ ہلدی پا کے
لُون کرارا
بلڈ پریشر جے نہیوں تاں
ہری مَرچ جِنی وی پا لئیں”
“کھانائے روٹی نال؟”
“جیویں مرضی”
“ناں کیہ اے ایہدا”
“پِیلک
ہور وی ناں نیں ایہو بتھیرا جان”
“پُھل ہوئی نہ ایہدی پچھان”
“نانہہ
آہ دانہ ویکھ نا”
“موتی ہریا”
“بی او کچا
پک ایہنے پِیلک ہونائی”
“ایہہ نہیں ہو سکدا
بھین میرئیے درد ہووے ای نہ
جوڑاں پٹھیاں نوں؟”
“ہو کیوں نہیں سکدا
آہ بُوٹے گھاہ رُکھ جوڑ پٹھے نی تیرے میرے
پانی مِلے نہ اِکو جیہا، ہَیں
گھٹ مِلیا جیہنوں اوہ سُکّا
ودھ مِلیا اوہ گلیا، ہیں، نہیں؟”