(کوٹھیوں پھاٹک ول ٹُرو تے
سُکھ چین دا رُکھ اے نِکا جیہا، پیتلی جیہی چھاں،
دری نِکی جیہی وِچھی پئی اے سُکھ چَین تھلے
کُجھ تھاں رکھ کہانی سُنیئر سنگیاں لئی بابا منّاں بیٹھے ہوئے نیں -
انر آیا اے تے کول بہہ گیا اے)
انر: اِک گل پچُھنی آہی اج میں
منّاں جی: جِتنیاں مرضی پچُھو
انر: ہزار کہانیاں یاد نیں تُہانُوں منّاں جی
اِک حاتم طائی دی سَرپَر تُسیں سُناوندے او ہر آئے نُوں،
ایہہ کیوں
منّاں جی: کر لینے آں ایہہ گل میاں انر پہلوں ایہہ تاں دسّو
سُنیاں نیں جیہڑیاں تُساں
پوہی اوہناں چوں کیہڑی اے تُہانُوں
انر: اِک تے تُہاڈی اپنی،
سُناواں؟
منّاں: چلو، سُن لینے آں اوہ،
چیتا سرس ہووے کُجھ ایس عُمرے
انر: (منّاں جی بن کے)- ناں اے میرا فتح محمد،
بِھمبر شہر دے وسنیک آں
گجرات جہلم کشمیر جمُوں
سارا اساڈا دیس،
ماں اساڈی
مائی گُلاب بیبی
بلپن وِچ ای مُرید اسانُوں
وٹالے والیاں دا کروا گئی،
پِیر تدوں آہے حضرت حافظ صاحب،
سِر تے ہتھ پھیر اوہناں دُعا کیتی
وت دَورے تے سرکار
جدوں وی دیس اساڈے
پھیرا پاونا
سد کے مائی گُلاب بیبی نُوں
بال دا پچُھنا، دُعا کرنی
ہوئے اساں وڈیرے
تے مائی جی گُذر گئے
اساں مجُوری ریل دی کر لئی
پٹری وچھاون دا کم کیتا ست ورھے
اوتھے ای اساں
لِکھن پڑھن وی سِکھیا ماڑا موٹا
وت ریل دی چھڈ مجُوری
اساں پِیراں دے ڈیرے آ بیٹھے
کہانیاں ڈھیر چیتے وِچ لہہ گئیاں آہیاں
راتیں وڈکیاں کولوں سُن سُن
اوہ اساں ایانیاں نُوں سُناونیاں،
پیر حویلی دے بالا خانے
کمرہ اِک، سو ورھے پُرانا
اسانُوں ڈھی گیا ہا، نِکا جیہا
لوک رنگا رنگ کرن سلام
یا تویت لے دُعا کراون پِیر دوارے آونے
گھڑی کول اوہناں ساڈے بہہ کے
کوئی اپنی سَرپَر سُناونی،
کتاب کوئی کِسے لیاونی
اساں ٹوہ ویکھنی،
وادھو کپڑے جُتیاں اپنیاں بالاں دے
ساؤ اساڈے کول دھرا جاندے
جے کِسے نُوں لوڑ ہووے تاں دے چھڈیو
ساڈے لئی دُعا کرا کے،
اِک دِن پچُھیا انر مِیاں جی تُساں
منّاں جی، تُسیں حاتم دے
عاشق ایڈے کیوں او
میں آکھیا، دِل میرا کردا اے
ہر جی حاتم ہو جاوے
ہر کوئی خوشی نال اِکدوجے دا کم نبیڑے
کوئی بُھکھا ننگا نہ رہے،
تُساں آکھیا منّاں جی ایہہ ہو سکدا اے؟
میں آکھیا ہو کیوں نہیں سکدا،
اپنی کیتی میں تُہاڈے نال سانجھی کراں
تُسیں اپنی میرے نال،
حویلیاں کوٹھیاں سبھ دِیاں
سانجھیاں ہو جاون،
سبھ سانجھے ایہہ دُھرل منارے
اتے اوہ گُھرل چُبارے