راتیں مینہہ وسیا
ساون دے پہلے مینہہ دی وڈّی اُڈیک رہی
دریا تے سُکدے جاندے ای نیں
بھوئیں ہیٹھلا پانی وی سُنیائے کُھٹدائے پیا
سوکے ایویں لگدے رہے
ٹُوویل وگدے رہے
تاں کُجھ ورھیاں دی گل اے پانی لبھنا ای نہیں
راتیں مینہہ وسیا
گھنٹہ ورھیا ہونائے
ڈیڈھ کُو گھنٹہ لا لؤ کِن مِن پا کے
سڑکاں نہراں بنیاں
نیویں محلے کچیاں ابادیاں
مُڈھوں نیں ڈُبن گِجھیاں
اُچیاں کالونیاں نوں وی آئی تریلی
بیڈ روماں دے اندر پانی جا وڑیا
بتی انھی ہوگئی نلکے بول گئے
توتا درزی آہندائے
مینہہ نوں آکھو باہر و باہر زمیناں وتر کر جائے
ہیٹھو ہیٹھ بھوئیں دی ٹینکی بھر جائے
شہر اساڈے ایہدے وسن جوگے کوئی نہیں
تاں بولی سرداری چُوڑھی
بھا توتی مینہہ شہراں پنڈاں جوگا آہا کدو کا
مینہہ ہا یار بھوئیں دا
آؤندا ہا سِک سَدیا
بھوئیں تُوں میں پاڑ نکاحی
یار وَسے تے پَھسّے