تالیف القلوب
عرف
قصہ لاٹو و پردیسی
(بطرز ہیر وارث شاہ)
بزبان معجز بیان شاعر بے بدل مقبول لم یزل
فقیر نور محمد فضل شیر فروش المتخلص بہ پردیسی
سکنہ منڈی موتا سِنگھ ضلع گجرانوالہ حال وارد لاہور
پردیسی آہدائے لاٹو ہا نال میرے
نوَں ساون آہی
پردیسی کون اوہ آپنا شاعر اے جی
جلسیاں وِچ مسیتاں وِچ بولدا اے
مِٹھا واج رسیلا تے درد بِھجا
سُن کے کوئی نہیں اتھرو روک سکدا
اوہ پردیسی تے ہے جس آکھیا اے
ایہہ روح قلبوت دا ذکر سارا
کملے لوک نیں قصہ ای سمجھدے نیں
دنیا بھلن تے پیر دا بھیت پاون- اوہو
پردیسی آہدائے میں لاٹو نوں آپ دسیائے
ورھے دِن ایتھے ہِیر آوندی آ
سوگھی والا کوئی ورلا ای ویکھدا ای
جیہدی اکھ وِچ سخی دا سُرمچو اے
ہور ٹکراں ہیڑ اے انھیاں دی
اکھے موڑ مُڑے آں باہرلی سڑک اُتوں
میلہ بھکھیا پیائے
لام ڈوری اے چدراں سخی دیاں
حق توں ای توں ڈھول ڈُھکدے نیں
اسیں آئے آں مگرے وزیر آیائے
چدر چاڑھیوس ریشمی زری والی
شاعر نال سن لہور دے وڈے وڈے
میں وی نال رلیاں لاٹو باہر رہیائے
ڈیرے دار فقیر نیں آئے بیٹھے
چاہواں پکدیاں نیں
چونہہ گُٹھاں توں ہیر دا شور جلوہ لاوڈ سپیکراں تے
باہیں ٹُنگ دیگاں والے جُٹے ہوئے نیں
مُڑھکو مُڑھک پئے لنگر ورتیوندے نیں
اجدی رات ای ہیر مقابلہ اے
پردیسی دسدا اے لاٹو نوں آکھیا میں، ایتکیں ویکھناں میں
پچھلی وار انصاف نہیں ایہناں کیتا
نمبر چار نوں کِھچ کے دو کیتائے
چنگا وٹ اکھے، نوَں ساون ہوئی مینہہ تے آونا اے
باہروں شور اے لاؤڈ سپیکراں تے
آ جاؤ آ جاؤ بئی پھلاں دا جُوس اصلی
نقد سو روپیہ آ جاؤ انعام لے جاؤ جیہڑا نقل دسے
گھیو خالص ثبوت نہ کرے جیہڑا پنج سو نقد پھڑے
آئیے لڑکی اوپر نیچے مچھلی ہے
بکری آٹھ پستان والی
ڈبل جگہ پشاب والی
موت کا کنواں وِچ مُورتاں نچدیاں نیں
تیری ہو گئی پیار وِچ کھو گئی سبھ توں سوہنیا ہائے من موہنیا وے
اتوں ویہندیاں چوں گِرئیے ٹوہندیاں نیں
نَوں ساون آہی مینہہ آون والائے
وِچ دربار دے جھیت نہیں لنگھنے دی
اوہو بوہا ہویا وڑن نکلن دا
گڈا وڈ جنانیاں جنے وِچے
کیہڑے وڑدے نیں کیہڑے پئے نکلدے نیں کون پُچھدائے
ہور دربار نہیں بیبیاں وڑن دیندے
ایتھے اجے نہیں ہویا قانون لاگو
پردیسی آہندائے ایہہ لاٹو تے جھگڑ پیندائے
مادھو لال حسین وی بلھے شاہ وی
مار وی کھادیس اِک واری
کوئی آہی وچاری، جی میں جھٹ دا جھٹ سلام کرنائے
ایس آکھیا کیوں نہیں وئی جان دیندے
''لِکھیا دِسدا نہیوں''
''جیہنوں مِلناس اوس تے نہیں لِکھیا''
''تینوں پُچھ کے لِکھنا س''
ایہہ بحثن اوہ ملکڑے اندر وڑ گئی
ایہنوں ٹُٹ پئیاں ٹوپیاں جالی دیاں
اندروں نِکل کے سِدھی اوہ ہو نہیں پئی
مینوں آکھو جو آکھنائے ایہہ کون اے
چلو چلنی آں میں جِتھے چلنا جے
اوہلے کر مینوں ٹوپی اِک آکھدی اے
''بھائی جی نوکری اے
ماواں بھیناں نیں ساڈیاں وی
اسیں مُونہہ تے سچ نہیں آکھ سکدے
تہانوں پتہ اے صاف نہیں ہوندیاں ایہہ
کِسے ویلے وی ایہناں دا پتہ کوئی نہیں''
اجے پِیر تے نہیں قانوں لاگو
نَوں ساون گُماں، بُوہا ویلنا اے
پردیسی آہدائے میں لاٹو نوں پیا دسناں
بھائی سچے نی محکمہ اوقاف آلے
توبہ ویکھ نہ ہُن بڈھیاں وِچوں بندے بندیاں وِچوں بڈھیاں پئیاں نکلدیاں نی
عضو عضو نے اگے حساب دینائے
میں بولناں تے اندروں نِکلی اے کوئی
لاٹو آکھیائے ہیر پردیسی اوہ ہیر
مینوں سمجھ نہیں آئی ایہنوں ہویائے مُڑ کیہ
ایہنوں اک نے جھاڑ کھلہیا ریا اے
اِک مَور مَلدائے
اک آن کے پیسے پھڑائے نیں لؤ تہاڈے کھیسیوں ڈِگے جے سانبھ رکھو
چِٹیاں کپڑیاں وِچ اِک مُچھ والا پیا پُچھدا اے کیہدے نال سی ایہہ
پانی لین میں باہر نوں بھج وگیاں
پانی لبھناں پیا تے مینہہ آن لتھا میلہ اُجڑ گیا
بڑا پُچھیا میں لاٹو تینوں کیہ بنیاں
اندروں سادیاں جہیاں ای نکلیاں نیں
نکلیاں وڑیاں ہزار نیں اوہا جیہیاں
اگوں بولیا نہیں -