رَل وسنی اساڈی
مَچھ کَچھ نال تاں آہی پَوندلی،
ول کِیڑ مکَوڑ نال وی گھنی تھئی،
پکھو پشو جاں آئے
رونق ہور بنی،
منس جُون تے کَل دی گل اے
پھُل پھَل پتر اساڈے ایہناں چُگنے
ساہ ست سانجھا کرنا
اگنی، ورھنی، ہُسّڑ، پالا رل جرنا رل ورنا،
ہَولی ہَولی ایہناں اندر اُچ جِھک دا ہول بھار دا
رُولا ورتن لگ پیا،
تِیا1
جیہڑی مُول آہی
تن سار پروار دی
مرد ادِھین ہوئی،
بہتے ہِین کمِین تھئے
گھالِیں گُھلدے
راہک مالی
ساڈی سانبھ دا دم بھریندے آئے
تھوڑے مالکی وان،
ساڈے نال وی لاگ منس دا ہوروں ہور ہویا
مَل دا جَھل تھئی کار ایہناں دی
1- تِیا= نار، جنی-
سانوں مِلکھ کر وڈھنا گڈنا
باگیں بنھ وت ویچنا وٹنا
محل کوٹِھیاں پَینے
گملیاں وچ سانوں لاوندے نیں
کندھاں چھتاں اُتے وی چاڑھ وگاوندے نیں،
اکھاں ایہناں دیاں ویکھنہار تے رہیاں کوئی نہ
ہوئیاں وکھاونہار،
آہر اساڈا دُھروں ہے دان، جِتھاں کِتھاں وی ہوئیے
جو آہر سو ہوون ہویا،
ایہہ گل ساڈی نہیں بیان
تھانُو کچہرُو یا اخبارُو،
مُونہوں نِکلن لگ پَوندی اے
جاتک جاتکڑی کول جاں کوئی آن کھلووے
یا تیرے جیہا کوئی بُڈھڑا
کل ہوئی جیہنوں اج یاد نہیں رہندی