مائی وسائی بائی
تھرپارکر جائی
ڈھول تے گاوے
ڈھولکڑی اِک پُتر وی نال ملاوے
ہتھ مُسیر دے واجا
پُتر آکھے راگ تال دی اساں سار نہیں
پکھی واس آں
مُڈھوں گاوندی اے ماؤ اساڈی
پیو نہیں نکلن دِتا
‘‘بہہ گھر، مُسلماننیاں نہیں پِھر پِھر گاوندیاں’’
مائی وسائی بائی
گُوڑھی لاکھی
بانہیں چُوڑا سِر ساڑھی دا پلّہ
ہسّے
‘‘ایہہ پُتر مینڈا گھروں کڈھ لیایائے ماں نوں’’
عمر وڈیری واج کراری سُر وِچ کاڑھی
سہج سبھائیں چوتھے سپتک جاوے
نال ڈھول تے تال ونو ون لاوے
بول کبیری میرا بائی
ہور گاون کئیں بولی راجستھانی
مائی وسائی بائی ہسّے
‘‘دیس اساڈے راج اے رج پُوتاں دا
پکھی واساں دے کھمب کھوہے
لال شہر جیہناں پائے
ٹِفن کیریئر گاون بمبیؤں آون
وِنگا ساڈا آکار مِٹی دے توے دا ہُجھدائے اوہناں نوں
کیہ کرئیے پر عام دلاں وِچ گُجھدائی اوہائے’’