''مسلے دا حل نہیں کوئی''
''ہے''
''کیہ''
''ہَل''
''حل؟''
''نہیں، اِک اکھ والی دیسی ہ نال جیہڑا لکِھیندا اے
ہلن توں بنیا''
''واہیائے کدیں؟''
''نہیں، پر کھاہدا پاتا اے اوہدا اُپایا''
''لؤ، ایہہ تے گل نوں بھوانٹی دیون ہویا نا
ہل دا پھل تے لوہے دا ہوندائے،
کدیں پتھر دا ہوندا ہا
لکڑ دا پھیر ہویا
ویلے نال لوہا لگا،
ہُن ٹریکٹر ناں رکھائس
دھوتی کُڑتا لاہ پتلون پائی اے،
شکلاں ہل وٹائی آیائے
تیرے والا حل نہیں پھیر وی ہویا
تُوں شاعر
تیرا ہل تے لِکھیا دِسدائے
یا سُنیندائے واچیا
ایہدا تے پھل کوئی نہیں''
''ہَل چلیندا کون اے
کیہدے حُکم تے؟
اپنے اندروں بولدی اپنے رج سُکھال دی مانگ
کہ تانگھ مزیرے دی
مِلکھ مالک دی گل وِچ پا کے اوہنوں ناواں دیون دی
کہ ٹھیکیدار دی
جیہنے مالک سوکھا رکھ کے آپ سُکھیرا ہونا ہے؟
کہ کُل خُدائی دی
اندر اپنے دِل دے
جیہدی سہج واج کدے دُور دُراڈی گُونج ہو ویندی اے
کدیں لگ چھاتی نال نینہہ دے رنگ سُجھیندی اے
ایہو ای ہل دا پَھل ہے،
آہو،
وگدے دا وی تے لِکھے دا وی
جیہنوں بھوانٹی تیری نے
وگنوں پرے کر دھریا اے''