فرید بھنڈار

فلُودہ بہُوں 1 جگ جاتا2 اے قصور دا

ایتھے وی ہٹیاں اوہدِیاں

جاء جاء کُھل گئیاں نیں،

حکیم دسیندے نیں

ایہہ خوراک نہار مُونہہ3 کھاون والی اے

ایہدے وِچ فولاد جو ہویا،

سوچِیں پونِیاں ہاں

فلُودہ کُولی4 وست ہوئی

فولاد ابَھجّل5 لوہا اے

ایہناں دا کِنج ملاپ تِھیا،

اچیتی سار سریندی اے

پیار ملُوکا6 ساڈا آپو وِچ جیویں

سِرڑ7 پکیرا ہویا،

تُرت1 اساں چھڈیاں دُکاناں لاہے وان2

رل فلُودہ تِھیون3 دی اساں دھار لئی

1- بہُوں: بہت- 2- جگ جاتا: دُنیا تے مشہور- 3- نہار مُونہہ: خالی پیٹ- 4- کُولی: نرم-

5- ابَھجّل: نہ ٹُٹن والی، سخت- 6- ملُوکا: نرم- 7- سِرڑ: پکپائی، پکی کمٹ منٹ-

1- تُرت: فوراً- 2- لاہے وان: منافعے والیا- 3- تِھیون: ہوون-