فرید بھنڈار

ملبے والے دو ٹھّیے نیں آہمو ساہمنے

سجّے گیاں جوان جینز وچ دفتر لائی بیٹھائے

‘‘اِٹ پرانی لینی سی میں’’

‘‘ویکھو’’

ویکھ کے میں مُڑ دفتر آیاں

‘‘ساہمنیوں وی ویکھ آواں 

جے اوتھے وی نہ لبھی جیہڑی میں لبھناں 

تاں ایہو لے لَیساں میں آ کے’’

‘‘تہاڈی مرضی اے۔ میری منو تے نہ جاؤ’’

‘‘کیوں’’

پُڑپُڑی کول اُنگل بھوائیوس-

‘‘ذہن ہلیا ہویائے

گل کرنی ہور کوئی چاہوندائے کر کوئی ہور جاندائے

گاہک خراب ہوندے نیں’’

‘‘چلو میں ہو آوناں’’

‘‘اوہ تہاڈی مرضی اے 

مال پسند ہویا تے دسناں 

میں مگوا لیساں’’

سڑکوں پار گیاں

داڑھی دھوتی، گَل دی موڈھے، لباں صاف، ہتھ لوٹا،

ہسیائے

‘‘کیوں نہیں منّی اوہدی، کیوں آ گئے او’’

میں حیران تھیاں کُجھ بھیڑا پیاں

بھیت نال آہندائے نیڑے ہو کے

 معشوق جے ہر ویلے ساہمنے ہووئے

ذہن نہ ہل جائے عاشق دا تے عاشق کاہدا ہویا ہیں جی’’

‘‘اِٹ گول پرانی لینی سی میں’’

‘‘آؤ بسم اللہ، لوٹے سَنے اوہ نال ٹُر پیائے

‘‘نانک شاہی وکھاواں مغل وکھاواں 

ایہہ ملبہ نہیں جے حلوہ جے

ست عمارتاں شاہی ایہدے وچ پئیاں نیں

تاں کِتے پکیائے

ایہہ حلوہ ای جلوہ جے

لے جاؤ

ایہنے کوٹھی تہاڈی اندروں اوہو نُور وکھا دینا اے خلقت نوں 

ہاں آرکی ٹیکٹ سیانا لبھیو

لبھیا ای ہونائے تُساں سیانے بندے او

جِس اصل عمارت ڈِٹھی ہووے 

اوہ ایس گِری میوے دا مُل جاندائے

پر ایہہ وی گل جے

جِس ملبہ نہیں نہ ڈِٹھا

اوہ اصل عمارت ویکھے پیا

اوہنوں دِسنی ای نہیں

ہیں جی

باتشاہو جس اُلٹی کدے نہیں کیتی سُنگھی

اوہ کھان پچان کیہ جانے ہیں جی’’

پتہ نہیں اوہ سمجھیا میں کُجھ کاہلا پے گیاں، آہندائے

‘‘ویکھو ویکھو تسلی کر کے، میں بہہ جاناں 

سَودا ساہمنیوں ای لَینا

پسند کرو جو ایتھوں اوتھے اپڑ جا سی

اسیں آپ جو اوتھے وِک گئے آں’’