]سُوجھے دے گھر دی تریجی منزل- نظام تے سُوجھا بیٹھے گلاں پئے کریندے نیں -[
نظام: کیہ کیہ نہیں سُنی لوکاں کولوں - سُوجھا سرکاری بندہ اے- ہُن نہ مِلو اوہنوں - ایہہ لِیتا جے اوہنے، اوہ لِیتا جے- پر میں اِک نہیں گَولی کدے
سُوجھا: نجامی ساڈے جیہی لگن اِکدوجے نال وی وِرلی ای ہونی اے ایس دُنیا وِچ- نِکے ہوندیاں دے کٹھے کھیڈے لگے، ہُن تائیں کھیڈنے آں پئے- کیہ کیہ اوکڑاں مینڈیاں تُوں نہیں نبیڑیاں، کیہ پتہ کِسے نُوں
نظام: دینہو دینہہ تُوں سار مینوں کروائی- کیہ پئی کرویندی اے سرکار- کیہڑے پاسیوں پیناسُ ہُن تے کیویں - ایہہ نہ تُوں کریندا تے خبرے کدوکے ترُٹ بھج گئے ہوندے-
سُوجھا: تُوں ہیں تے میں ہاں نجامی- ماں مینڈی سہیلی بن تینڈی کیہڑیاں پُٹھیاں پٹیاں پڑھیندی آئی اے تینوں ہمیش- تُوں کدے نہیں منی اوہدی
نظام: اوہدی گل جیویں وی ہووے، انت تینڈے نال جُڑت ودھیندی اے-
(سُوجھا اُٹھ باہروں دو کوَلے دُدھ گِھن آیا اے- اِک نظام نُوں دِتاسُ تے دُوجے وِچوں آپ گُھٹ بھریاسُ بہہ کے)
نظام: مِٹھا، تینڈے ورگا (دونہاں گُھٹو گُھٹ کوَلے مُکا گِھدے نیں - اچیتی نظام اُٹھیا اے ڈولدا، سِر چَھنڈدا)
سُوجھا: کیوں نجامی، کِتھے؟ (نظام ڈولدا کندھ نال سِر لاوندا اے-)
نظام: مُک گیاں میں تے- ساہ…… ساہ نہیں پیا آوندا
(ڈِگدا ڈَھیندا نِکل گیا اے- باکھو دے کمرے آ کے ڈَھے گیا اے)
باکھو: کیہ ہویا ای- کُجھ کُھوایا تے نہیں اوہنے تینوں؟
نظام: دُدھ…… دُدھ……
(باکھو پُڑی اِک گھول پیائی اے نظام نُوں سِر پھڑ اوہدا- اوہنوں اُلٹی آئی اے- اُٹھن دا جتن کیتاسُ- باکھو اوہا کوَلا اوہدے اگے کیتا اے- نظام اُلٹی کر کے سنبھل گیا اے-)
نظام: مُکدا جِیون مُڑ سجرا کر دِتا ای باکھو
باکھو: تینڈی کرنی مینڈے مُکدے جِیون نُوں سجرا کریندی آئی اے (نظام نُوں گلوکڑی پا چمیُوس-) جیہڑی وِس وِسکی ایہہ آپ پِیوندا آیا اے اوہا تینوں پیائی سُو- تُرت پرت تُوں ہُن- گھوڑی تینڈی میں پِچھلے بُوہے آن بدھی اے- اِدوں نِکل ونج
نظام: میں تے آیا ہامی آکھن ایہنوں جبرو نُوں چُھڈاون دی
باکھو: آپنے پھڑائے نُوں آپ چُھڈاوندا؟
نظام: مِل آیا ہامی جبرو نُوں جیل وِچ
باکھو: کیویں
نظام: تھانیدار بن کے- میں آکھیا اُٹھ نِکل چل جیلوں - آہندا اے مینوں کالھے ہوون دے میہنے مریندا آیائیں ہُن آپ کالھا پیا پینا ایں - میں ساتھی قیدیاں سنگ جیل بھننی او- کم تے ساڈا ہویا مَلّ ویہار دی جیل بھن مُکاون جہانوں
باکھو: کھری کیتی اے جبرو - تُوں لگ کم تے- سُوجھے پنج مُربّے گِھننے نیں تینوں مارن دے- جھبدے نِکل ونج- سرکاری رپوٹ گِھنن کوئی آوندا ای ہوسی پیا- پُتر دا یار ماں دا یار درج نہ ہو ونجے نہ ہُن
(نظام نِکل گیا اے)
-----