بُھونڈ لڑن پئے
سانوں نہیں
اِک دُوجے نوں
اِک آکھے ‘ڈنگ پہلا میرا’
اِک آکھے ‘نہیں میرا، دُوجا پُتر میرے دا
تریجا تیرا
پُتر میرے نوں دِھی جے دے دِتیو تاں’
اساں ملکڑے کھکھر لاہی جا مکھیاں نوں دِتی
آکھن ‘اج تے نہیں اساں جِمیاں
جُگ جُگ ویہندیاں آئیاں ہاں کملیو
ماکھی ٹھگن دے ڈھو تہاڈے
اساں کون تُسیں کیوں جانو
رِزق اساڈا بھوگ پُھلاں دا تانگھ مِلن دی کھنب اساڈے
ڈنگ سوگ ہے
گھر ساڈے وِچ کندھاں کوئی نہیں
نِرت مہکار سجن دی آل دوال ہے
ایہہ کھکھر محل مبارک تہانوں
دارالخلافہ بُھونڈ شاہی دا’