مذہبی سِکھ ہا دادا میرا
رَولے پئے تے ساڈے گھر توں ترے پیلیاں چھڈ کے باڈر بُتی ٹُھک گئی
ٹُر سردار گئے
مگرے کمّی کارے
دادی اَڑ بیٹھی
‘‘نہیں جانا میں چھڈ کے دیس
مُسلّن ہو جانی آں کلمہ ایہناں دا پڑھ کے’’
‘‘کوئی سِکھ نہ مار جاوے
وِچ ترے پَیلیاں ای نیں’’ دادا آکھے
‘‘مار جاوے میں جانا کوئی نہیں، تُوں کر جیویں ای مرضی’’
نالدے پِنڈ ہا گِرجا
پادری آکھیا آؤ ہسائی کر لیناں میں
تہاڈے مگر انگریز امریکہ رہو رمان نال ایتھے ای
دادی آکھیا رکھ کول انگریز امریکے
سانوں ٹھاہر بڑی اے
پادری ہسیا خیر اے آ جاؤ اسیں وی ہاں تے دیسی
دادے مگروں پیو میرے گِرجے بوہکر پھیری
لاہے نویاں آیاں ججماناں دے کوٹھے
کَھیہہ کھہیڑ پیو دی ماں نال رہندی ہئی ہر ویلے
اوہ ٹُر شہر گئی
مالک ہور کر لیا اوتھے
اوہدے دھڑے دیاں پیو میرے دا یار ماریا
پیو اوہناں دا وڈکا لاہ چھڈیا
عمر قید بول گئی
پِچھے میں دادی پال سمھالی
پندراں ورھے بُھگت گھر آیا
ماں وی مُڑ آئی
لگی لڑائی اونویں
اِک دِن کُٹ کھا ڈِگی
دِل دا دَورہ پیا تے مر گئی
پیو وٹہ سٹہ چا کیتا
مینوں دِتوس اِک انّھے نوں، اوہدی بھتیجی میرے ہان دی کر لئی
اوہ مینوں کھان پوے
میں انّھے تائے اوہدے کول جا کے راتیں کِھسک جو آواں
پیو دِیاں اکھیاں لال ہو گئیاں
‘‘ماں تیری کول ٹور دیناں میں تینوں’’
میں ڈر نس شہر گئی
ماں دے دُوجے گھر والے مینوں رکھ لیا دِھی کر کے
پندراں گھراں دا کم میرے متھے لایا
دو واری ڈِھڈ کرایا کڈھایا
میں پُتر اوہدے نال نس گئی
اوہ بھین آکھے مینوں لوکاں ساہمنے
میرے ساہمنے یاراں کولوں میرے پیسے پھڑے
اِک دِن مینوں خورے کیہ ہویا
میں چُھری اوہدے ڈِھڈ پھیر دِتی
تھانے بند ہوئی
راتیں پُلسیا ہِڑ پیا
میں وساہ کے سِر اوہدا فرش تے مار پاڑیا
زنانی جیل پئی
وِیہہ ورھے اوتھے جھاڑُو پھیریا
باہر جدوکی آئی آں
خاب اِک راتیں روز آوندی اے
اگ لگ گئی اے شہروشہر
جگ سڑ ہویائے سواہ
جھاڑُو میں ہتھوں نِکلیائے چُنّی میری سِر ول کے
سواہ سوت کے کردائے ڈھیری
دھار مار اُتوں روڑھ وگاندائے
جنگل اچنبھا لاکھی اوتھے اُگ آیائے
میں تے جھاڑُو نالو نال دو رُکھ ہاں
پئے ہور جیہی بولی وِچ گُوڑھیاں پاؤنے آں
گِنن گوچرا نہیں سواد اوہ
نال ہوو تاں مانو