ہن کیہڑے ساک تینوں پُتر سداں
ساہو میریا پلیٹھی جمیا
میں بُھل گئی
میں تینوں جمدے نوں نہ دسیا
اساں لوک آں فوجی
کمپ اساڈے ٹپریاں
مدتاں ہوئیاں سانوں لام لڑیندیاں
شہر شہر اُتے ہلہ کریندیاں
جمن لاء تدھ گبھرو تھیون تائیں
میں ایہہ کوڑ نہ جیبھوں کھور کے تینڈے کَنِیں پائی
شہراں والے شہروں باہر زمیناں والے ویری اساڈے
جتھاں ڈیرا لائیے گھیرے پے جاندے نیں
راتو راتیں چاء ٹپریاں ساہ ہتھیار چھپاوندے
اوہ پڑ چھڈ کے دشمن نوں جا ہور کتھے للکاریدائے
کاکو مینڈی بھین دی جائی
گُدڑ اند رجاگو میٹی
تینوں آہندی رہی مینوں ڈر لگدائے مینوں ڈر لگدائے
رتیاں کتراں جوڑ کے جَت بناونی اوہنے
کَھٹیاں کتراں جوڑ کے پُوچھ بناونی
نیلی ٹاکی لیوی لا کے جُسا کَسنا
سینے سورج ٹِکہ لاوندیاں میں اوہنوں ایہہ نہ دَسنا
ایہہ گھوڑے نہیں کاگت کاکو
ایہہ گھوڑے نہیں لیراں
ایہہ اُڈنے سپ نی بار دے
اَن گھات تَھلیں دریا
تن راتاں باریں ساونیاں
اَتے بجلی ساج فناہ
ایہہ پارس کرن اسوار نوں
ایہہ چَھٹے سورج بھا
پاون اکھ سلائی موت دی
دیون دھرت اگاس رلا
جَت رَتی ڈیلے ہاڑھ دے
اتے پوچھ بسنتر واء
کرن دھوڑ دھمال حویلڑیاں
دیون جاگ رُڑی نوں لا
ایہناں گانے بدھے اگم دے
تھیے آپنے آپ گواہ
ایہہ جیون پل لشکاردے
وت عمر اڈیک اتھاہ
میں بُھل گئی
میں کاکو نوں کُجھ نہ دسیا
توں اوہدا ڈر لاہون لئی اوہنوں شہریں کھڑیا
ٹانگہ جویا
ترلے کر کر ویری نال بہائے چندرے
ویریاں ہتھیں کھٹیاں رتیاں کتراں تِھیندیاں
ویریاں پنڈے لیوی تھیندیاں
اوہنوں ڈر دی سُرت نہ رہی
میں بُھل گئی ساہو
پُتر سَدّن لئی
تینوں وَت جَمساں ہُن بڈھڑی کاٹھی