پہلے گیئریں کِلھدی کِلھدی
بس جِھیکل جھوک توں نکلی
جِھیکل جھوک توں سِکھر کوٹ دا دَس کوہ پَینڈا
کھڑے پہاڑ تے آڈا رَستہ
ٹائراں ہیٹھاں وَٹے کِر کِر کَھڈاں ٹَپدے دور ڈھلائیاں وِچ گواچن
ایس راہیں میری پہلی واری
کَدے میراں داد ڈرائیور میرا جیپ خراب نہ کردا
ساہ چِیلاں دا ساز سگندھ تے پَرلے پہاڑ تے ٹانویں ٹانویں بنگلے
وِرد پٹھان میرے نال سیِٹ تے نہاتا کدے نہیں ہونا
چُپ کر کے اوہنے گنڈھڑی پَلیوں سِلا جیہا کو اب تے روٹی کھولی
پوپلے مُونہہ نال پشتو وِچ مینوں سُلاہ مار رہیا
ساہمنے میرے لال مرچ جیہی مائی پہاڑن بیٹھی
دھی دے دُکھ دی چھوہی کہانی
ساہ چیلاں دا- ساز سگندھ- تے پرلے پہاڑ تے ٹانویں ٹانویں بنگلے
بس کھلوتی
کلینر چھال مار کے پچھلے پہیے ہیٹھاں وَٹے اڑائے
نِکیاں جیہیاں دو کُڑیاں چڑھیاں
چَدراں وَلیاں سِر تے کَڈھیاں ٹوپیاں پائیاں
ننگے پیریں جَھکدیاں جَھکدیاں وَڑیاں تے مائی سَد کے کول بہائیاں
مہندی رنگیاں مُچھاں والے دو پہاڑی لیڈیز کوٹ پرانے پائی
اِک دوجے نوں آکھن
راجہ جی کوئی خبر سناؤ
تُسیں سناؤ نہ زورا ورو کے
دوویں ہس کے چپ کر جاون
جے میراں داد خبیث کَدے میری جیپ خراب نہ کردا
ساہ چیلاں دا- ساز سگندھ تے پرلے پہاڑ تے ٹانویں ٹانویں بنگلے
ککا کیرا چھوہر کلینر فُٹ بورڈ توں مائی نوں آکھے
ماسی نڈھی بھال نہ میرے جوگی
وے ہو تاں لے اَجے نڈھی جوگا
ہسدی مائی دیاں نِکیاں نِکیاں اکھاں
کُڑیاں وانگ مٹکنیاں ہوئیاں
سُکڑا جیہا ڈرائیور بیٹھا تھکی جائے نسوار تے نالے حَولدار نال واری سگٹ دی لاوے
پنجھی ورھے حَولدار جی- برما بصرہ
ایسے رَن دیاں کِلیاں نَپدیاں کُھچاں گھسیاں نیں باتشاہو
ایہہ کوئی پہاڑ اے چِھچھڑا
سِوَل دے کم وی کم نیں شوہدے منگل خانا- حَولدار کھنگورے
میں اینویں دورہ پوسٹپون نہ کیتا
پر ایس کواٹر وچ ٹوردے دے دن تُھڑ جاندے
ایکس پلے نیشن
ایسی تیسی ایکس پلے نیشن
پر کاہنوں اینوی رِسک خوامخواہ
ساہ چیلاں دا- ساز سگندھ تے پرلے پہاڑ تے ٹانویں ٹانویں بنگلے
ترکھی جیہی ڈھلوان دے اپروں میں میں کردی بکری لہہ پئی
مگرے مگرے نِکڑو جیہا اک چھوہر ملیشیا پائی سوٹی چائی آیا
میں اتھلیٹ رِہاں بیلنس رکھناں سٹ پھیٹ نہ لگی
اوئے بے غیرتا
سڑکے اُتے کیوں لئی پھرنائیں ایس ماؤ نوں
ڈرائیور تاکی تھانیں اُلریا
پٹھان کو اب تے روٹی جھاڑ کے جھولی دھر لئے
ہولی دتی مائی آکھیا- دستگیر
بس ٹُر پئی
ویکھ چاکھ کے چاچا
پچھلی سیٹوں گھبرو بولیا
آپ چلا اوئے اگے آن کے کیہڑائیں مہنگی جانے آلا
سانوں جان پیاری نہیں اوئے
گل سنو جی ایہدی- کلا پُتر ماؤ دا- سوہنا
کوئی نہیں کوئی نہیں منگل خانا خیر مہر اے ٹوری جُلو- راجے ہوراں کولوں آکھیا
میں سِر تاکی نال لا لیا
ساہ چیلاں دا- ساز سگندھ تے پرلے پہاڑ تے ٹانویں ٹانویں بنگلے
نِکی بھین نوں آرٹس کلاسز جائن کرا تاں دئیے
قسما قسم دے لوکاں وچ ایہہ گل نہیں چنگی
ویکھی جاسی- شوق تاں بندہ گھر وی پورا کرا ای سکدائے
سکلیچر- پینٹنگ
اک نکتے وچ جسم دماغ
اک نکتہ وجدان دو نہاں دا
نہ ہون دی آواگون تے اچن چیتی سار ہوون دی
سار گواچی چیز ملن دی
سمجھ لئی تاں رولا کیا- بس سمجھ لئی تاں رولا کیا
نکے بھرا دی جَوب دا آکھ تے آیاں
ہو ای جاسی انشاء اللہ- ٹیلی فون تے گل کریساں سکھر کوٹ توں
فرماں وِچ سکیورٹی کوئی نہیں- بندہ ساکھ بنا ای لیندائے
گورنمنٹ سروس وچ وی کیہ اے
کم کاج کڈھاون لئی بس اک جی ہونا چاہیدا اے ایدھر
اجکل کون کسے نوں پچھدائے
ساہ چیلاں دا- ساز سگندھ تے پرلے پہاڑ تے ٹانویں ٹانویں بنگلے
دستگیر- دستگیر
اتھلیٹ رِہاں میں بیلنس رکھناں سٹ پھیٹ نہ لگی
بس سنگڑ گئی
دستگیر دستگیر
کھبا ٹائر پِھسیائے خان جی
اماں خیر ای
خیر اے پُتر جاناں رکھیاں نیں دستگیر
ہویا کیہ ایہنوں منگل خاناں چنگی بھلی نوں
ہونا کیہ ہا راجہ جی- اجے یبھنا ہا کوئی ہور دیہاڑے
ڈَھل کے سڑک تے آ گئے سارے
جنگل اندر رات تے وِرلے تارے
ہیٹھ ڈھلائیاں وچ ہنیرا
دور کتے کوئی ہلدی لو
مائی کھولے پُھل مکھانے کِھیلاں
لَئو وے بچڑا لے نی دھیے
ورد پٹھان مینوں پولی دتی پچھیا
رب رکھیائے- کوئی سٹ پھیٹ تے نہیں نہ لگی
نہیں جی کوئی نہیں رب رکھیائے- میں آکھ تے دِتا اینویں
پر کیہ آکھاں مینوں اصلوں سمجھ نہ لگی
مینوں انج لگا- جیویں سڑک تے بُھنجے بیٹھے سارے گھر دے جی نیں
میں پروہنے کولوں بھج گیائے کچ دا بھانڈا
ایہہ آہندے نیں
کوئی نہیں کوئی نہیں
تاں کیہ ہویا