کریما ببخشائے بر حالِ ما
چوں آں جانِ جہاں دامن کَشاں شُد از چَمن بیروں
کُلُ جدیدٍ لذید‘’
کتاب لاثانی الموسوم بہ انقلابِ روحانی
ازملفوظاتِ متین پیرمیاں صغیرالدین بَرمانی
خلفِ سجادہ نشین با تمکین خان بہادر پیر میاں کبیرالدین بَرمانی
سابق ایم ایل اے پنجاب
المعروف قصہ دارا حسبِ فرمائش شیخ امیر بخش فقیر بخش اینڈ سنز
تاجرانِ کتب
با اہتمام منشی مہنگے خاں سابق ٹھیکیدار و اپیل نویس حال مینیجر
(جِس کتاب پر مُہر تاجران ہٰذا کی نہ ہو گی وہ مالِ مسروقہ تصور کیا جائے گا)
دارا میرے نال سکولے پیا سی کچّی،
میں گھر اُردو پڑھی ہوئی سی
زمیندار احسان اخباراں پڑھدا ساں
کانگرس دے، مسلم لیگ احرار دے جھگڑے
گاندھی نہرو قائداعظم
سبھ دِیاں جنم تاریخاں
نازی تے اتحادی فوجاں کل کِتھے سن اج کِتھے نیں
سارا پتہ سی،
دارا کچّی رہیا
مینوں پنڈت ہری چند جی دُوجی وِچ بٹھا دِتا،
پنڈت ہری چند جی کچی پکی دوویں پڑھاوندے سن
مُنڈیاں چَ ماشٹر ہری جھنڈی اکھواوندے سن
مینوں اوہ دُوجی والے ماسٹر فضل دِین کول لے گئے
ماسٹر فضل دِین نوں مُنڈے ماشٹر کُلو وال ای آہندے سن
طِلّے والے بھارے کُلّے پاروں،
‘ایہہ کیہدائے’ ماشٹر کُلووال نے پُچھیا
‘مِیئیں صاحباں کا’ ماشٹر ہری جھنڈی نے دسیا،
دارے نوں میں صُوف دواتے پاون زبانی دسیا سی
اوہنے مُنڈے مُنڈے کول جا سمجھایا
ٹاکِیاں گھروں لیا کے کئیاں نوں صوف بنا کے دِتے
اساں دوہاں ادھی چُھٹی ویلے وی مِلنا ساری ویلے وی
دارے مینوں نالدے حاطے وِچوں نمولِیاں لیا دینیاں
‘کھایا کر میاں پِھمنیاں نہیں نکلدِیاں’
مینوں اوہنے پِنڈ دِیاں گلاں سُناونیاں
کیہڑے پَھل نوں کیہڑا کیڑا لگدائے کِویں بچائیدائے
کھُوہ کِویں گالیدائے،
اِکدِن دارا کہندائے ‘صوف کھدر دا چنگا رہندائے
ہر ڈوبے نوں سیاہی سواہری دیندائے
جے آکھیں تیرا بدل دیاں’
میں چُپ رہیا اوس بدل دِتا
سیاہی والی اوہدی گل ٹھیک ای نکلی
مینوں بڑی حیرانی لگی
گھر آ کے میں وڈے بھرا نوں دسّی
اوہنے بڑِیاں جِھڑکاں دِتیاں
نوِیں دواتے مُڑ مَلمل دا صُوف پوایا،
نالدے حاطے والیاں دا وی مُنڈا واری میرے نال سی دُوجی وِچ ای
مینوں نمولِیاں دیندیاں اوہنے دارے نوں اِکدن ویکھ لیا
شکائیت لائی
ماشٹر کُلووال نے دارے نوں کن پھڑائے
اوہدی پھٹّی نال ای اوہنوں کُٹ سٹیا
پھَٹّی گھر دی کِکّر دی سی کالی، کڈھ گئی
چِٹی بزاری ہوندی بھج جانی سی
میں واری نوں آکھیا ‘نمولیاں رُلدِیاں رہندِیاں نیں
اینی مار پوائی اُو’
واری آہندائے ‘ساڈا حاطہ اے
توں اوتھے آ
جِنیاں مرضی کھا توں
ایہہ ڈنگر عُمر پُرے دا کون اے تینوں چوری لیا کے دین آلا
ایہناں ہتھاں نال ای گوہیا چکدے نی ایہہ
بُنڈ کدے دھوتی سو پُچھ کھاں گھِیسی کردا ای
تیرے گھر میں دَسّاں تینوں وی مار پوے’
میں واری کولوں ڈر گیا
دارا سُندا رہیا چُپ کر کے، چلا گیا
ماشٹر ہری جھنڈی نے کول بُلا کے آکھیا داریا اپنی جماتے رہی دائے پُترا،
اگلے دِن مینوں واری اپنے حاطے لے گیا ادھی ویلے
کُرسی اُتے بہایا، نوکر نوں اوس آکھیا
اوہ ڈونگھے وچ نمولیاں پا لیایا دھو کے
میں اِکدو مساں لنگھائیاں
باقی لفافے وِچ اوہنے پا کے مینوں نال پھڑائیاں،
عمر پُرا ساڈے شہروں باہر پہلا پِنڈ ہا
عمر پُرے توں اگے مسانِیں
وِچکار باغ ہا دادا جی دا
‘‘جاں فِزا’’ اوہدا ناں ہا
روز شام نوں آپنے ٹانگے سیر کرن لئی جانا اوہناں
مینوں وی کھڑنا
اگے نال بہاونا
پچھے میئیں حیاتے ہونا
خاص مرید ہا دادا جی دا
ووضو اوہا کراوندا ہا
بھاگ پُرانا کوچوان سی اوہنے اگے بمب تے بہنا
ہولی ہولی گھوڑی نوں کُجھ پُچھدیاں دسدیاں رہنا
کدیں میئیں حیاتے نوں واہ حیاتا کہنا
سن سنتالی اسیں تے کاراں وِچ لاہور آ گئے ساں
بھاگ قافلے نال ہا اوویں بمب تے بیٹھا راساں پھڑ کے
حملہ ہویا، لوکیں ڈنگر وَچھا چھڈ چھڈا کے نسے
پَیلِیاں وِچ کوئی وڑ لُک بچ گئے
بھاگ نے ٹانگہ نہ ای چھڈیا
وڈھیا گیا
ایہہ گل سانوں میئیں حیاتے آن لہور سُنائی
اوہ وی ٹانگے وِچ سی پِچھے اپنی سیٹ تے جِس ویلے حملہ ہویائے
اوہ کماداں وِچ دو راتاں لُکیا
فوجی ٹرک تے چڑھ کے لہور آیا سی،
دارے دی جیہڑی گل میں کرناں
تدوں اجے سنتالی وِچ چھ ست ورھے تے رہندے ای سَن نا
بھاگ نے پکی سڑکوں لاہ کے
عُمر پُرے دی کچی اُتے ٹانگہ پاونا
ٹوئے ٹِبے وِچ آونے ہُجکے لگنے
بھاگ نے بمب تے اڈول ای بیٹھیاں رہنا راساں پھڑ کے،
پِنڈ وِچوں لنگھدیاں دادا جی نوں
دوہاں پاسیاں ولوں سلاماں ہونیاں
ہتھ نال اوہناں جواب وی دینا
نک توں رُمال نہ لاہونا،
عمر پُرے وِچکار ذرا جیہا چِکڑ کھوبا آؤندا سی
اوتھے ٹانگہ ہولی ہونا
نِکے نِکے ادھ ننگے مُنڈے کُڑِیاں ٹپدے نچدے آونے
‘میاں جی سلام تہاڈی گھوڑی نوں لگام
تہاڈی گھوڑی اگے پَٹھے
اسیں چُھٹی لے کے نٹھے’
بھاگ اوہناں نوں اوئے توئے کرنی چھانٹا وی لہراونا
چھانٹا بھاگ لہراوندا ای سی
ماریا اوہنے کدیں وی نہیں سی گھوڑی نوں نہ مُنڈیاں نوں،
میں دارے نوں پُچھیا ‘ایہہ کیہ گاوندے نیں
مُنڈے کُڑِیاں تہاڈے پِنڈ دے’
دارے دسیا ‘ایہہ پُرانی گل اے وڈیاں دے ویلے دی
مُنڈے کُڑِیاں تدوں مسیتے ای پڑھدے سن
میئیں پڑھاوندے ہوندے سن
مُنڈے میئیں دی گھوڑی جوگے پٹھے لیاوندے ہوندے سن
کُڑِیاں لاؤن تے روٹی
تاں ای چُھٹی مِلدی سی’ ،
مینوں حیرانی ہوئی شرم وی آئی
کِتھے دادا صاحب
پِیر اسمبلی ممبر مُربیاں کوٹِھیاں والے
میئیں مسِیتل کِتھے
دارا سمجھ گیا
اکھے ‘بالاں نوں کیہ پتہ ایہہ گل پُرانی اے
میں آپ سکولے پیا نہیں ساں جدوں
تے ایویں ای کردا ساں’
دارے نوں مار پئی اے جِس دن
دو دِن مگروں دادا صاحب نال سیر گیاں میں
عُمر پُرے دا چِکّڑ آیا
مُنڈے کُڑِیاں آ گئے نچدے
‘میاں جی سلام تہاڈی گھوڑی نوں لگام
تہاڈی گھوڑی اگے پَٹھے
اسیں چُھٹی لے کے نٹھے’
مینوں لگا وِچ دارا وی ہے
ہوراں ہار ادھ ننگا
میں اگلے دِن پُچھیا ‘داریا
میاں جی سلام والیاں مُنڈیاں وچ کل توں وی سیں؟’
‘نہیں’
پھیر سوچ کہ آہندا ئے ‘آہو ساں میں،
میں سوچیا تُوں ہُن وڈا ہوندا جانائیں
وڈیاں والا سلام تے تینوں کرنا ای کرنائے
اجے نِکیاں والا تے کریئے
مینوں پتہ اے گل پُرانی اے
پر ایہہ وی پتہ اے
پَٹھّے گھوڑی دے ساتھوں پُورے ہونے نہیں
تے چھُٹی مِلنی کوئی نہیں’