ڈَھکی تے اُگیاں میں ایس پارک پہاڑی
کوئی کھجُور کوئی پام آکھ لنگھ جاندا اے
پِچھوں تھل دے ہاں
کہ کندھی سمندر دے
وڈیاں نوں یاد ہووے جے ہووے
پُچھ دسیو کوئی ٹکرے تُساں نوں اوہناں چوں تے،
پُٹھا لام کدوکا ہویاں؟
کُجھ نہ پُچھو،
سہج سبھا اُگ وگیاں الف نک سیدھے
پیراں ہیٹھوں مِٹی نِکل گئی
جاتم گئے کہ گئے
گالھڑ دوڑدی آئی
چڑھ سِر میرے
پِچھلے پیراں تے سِدھی ہو نہ کھلوتی
چِھبِیاں دیندی
اوئے لم لیٹا
کیہدی توپ ہیں تِیر ہیں کیہدی کمانے
گھر آ
میں وی لک بھوا اُتانہہ ول ہویاں ہسدا
سِر اسمانیں کیتائے
مِٹی سنبھل گئی،
اوہ جد وی آوندی اے
پُوچھل پھیر میرے پیراں تے
کُت کتاڑی کر کے گُڑھکدی نس جاندی اے